ابراهیم رشیدی‌‌نین اتهاملاری آرتیریلاراق بیر آی حبس قراری وئریلیب
۱۸ گوندور حبسده اولان ژورنالیست و تورک مدنی فعال ابراهیم ساوالان (رشیدی)، حبس قراری ایله ۲۵ دی ۱۴۰۲-ده دیندیریلمه سورجی باشا چاتدیقدان سونرا اردبیل حبس‌خاناسی‌نین ۷-جی بندینه (گوونلیک بندینه) کؤچورولدو.
بو آذربایجانلی فعالین یاخینلاری‌نین وئردیگی بیلگیلره گؤره، جناب رشیدی یاخینلاری ایله ایله‌تیشیم قوراراق اونلارا بیلگی وئریب کی، خیاو (مشگین شهر) اینقیلاب ساوجیلیغی‌نین بیرینجی شؤبه‌سینده اونا “ایران ایسلام جمهورییتینه قارشی تبلیغات آپارماق” و “قامو اویونو راحاتسیز ائتمک مقصدی ایله یالان یایماق” ماده‌‌سی ایله اتهام ایره‌لی سورولوب و بیر آی حبس قراری وئریلیب.
بو واختا قدر بو آذربایجانلی ژورنالیسته قارشی بو اتهاملارین ایره‌لی سورولمه‌سی‌نین سببلری باره‌ده بیلگی یوخدور.
جناب رشیدی ۹ دی گونو خیاو شهری‌نین میرکندی کندینده آتاسی‌نین ائوینده گوونلیک گوجلری طرفیندن حبس ائدیلیب و ۱۰ دی ۱۴۰۲-ده اردبیل شهری‌نین اطلاعات ایداره‌سی‌نین تجرید‌خاناسینا کؤچورولوب.
ابراهیم رشیدی تانینمیش آراشدیرماجی، ژورنالیست و مدنی فعالیدیر. او، آیدا بیر یاییملانان بایرام و یاییملانماسی قاداغان اولونان نوید آذربایجان درگی‌لری‌نین یاییم هئیتی‌نین عضوو، بلاگ یازاری و اولدوز اؤیرنجی ژورنالی‌نین باش مودیری و بولوت اؤیرنجی درگی‌سی‌نین باش یازاری اولوب.
ابراهیم ساوالان سون ۲۰ ایلده مدنی فعالیتلرینه گؤره دفعه‌‌لرله توتولوب، حبس ائدیلیب و ایشگنجه‌لره معروض قالیب.
