ابراهیم رئیسی و یانینداکیلارین دفن مراسیمی تهرانین مصلی‌سیندا باشلاییب
ایران مئدیاسی‌نین جانلی یاییملادیغی گؤرونتولره گؤره، ۳۰ اردیبهشت گونو هلیکوپتر قضاسیندا اؤلن ابراهیم رئیسی و سککیز نفردن عبارت هئیتین دفن مراسیمی بو گون، ۲ خرداد ۱۴۰۳-جو ایل چارشنبه گونو سحر ساعت ۷:۳۰-دا باشلاییب.
بیلگیلره گؤره، ایسلام جمهورییتی‌نین لیدری علی خامنه‌ای بو اؤلنلر اوچون “میت نمازی” اوخویاجاق.
رادیو و تلویزیون قورومو خبر آژانسی بؤیوک ایزدیحامین بو مراسیمده ایشتیراک ائتمک اوچون تهران مصلی‌سینا دوغرو حرکت ائتدیگینی ادعا ائدیب.
بو گون حؤکومت چارشنبه گونونو بوتون ایراندا رسمی تعطیل اعلان ائدیب و ایسلام جمهورییتی رهبری‌نین امری ایله ایراندا ۵ گونلوک کوتلوی ماتم اعلان اولوب.
ابراهیم رئیسی صاباح، ۳ خرداد گونو مشهدده دفن اولوناجاق.
بو گون چارشنبه گونو گونورتادان سونرا جمهورباشقانی‌نین کفیلی محمد مخبر و خاریجی ایشلر ناظرلیکلری‌نین کئچیجی ناظر ی علی باقری کنی‌نین ائو صاحبلیگی ائده‌جیی “۴۰ یاخین خاریجی نوماینده هئیتی‌نین” ایشتیراکی ایله مراسیم کئچیریله‌جک.
ایندییه‌دک پاکیستانین باش ناظری محمد شهباز شریف بیلدیریب کی، او، ایرانین کئچمیش جمهورباشقانی ابراهیم رئیسی و اونون یولداشلاری‌نین دفن مراسیمینده ایشتیراک ائتمک اوچون تهرانا گئده‌جک.
آیریجا، ایران ایسلام جمهورییتی تلویزیونونون جانلی گؤرونتولری اساسیندا، ابراهیم رئیسی و اونون یولداشلاری‌نین دفن مراسیمینده حماس قروپلاشماسی‌نین سیاسی لیدری اسماعیل هنیه و حزب‌الله لیدری‌نین معاونی شیخ نعیم قاسمین دفن مراسیمینده ایشتیراک ائدیب.
آوروپا بیرلیگی و آمریکا طرفیندن ترور قروپو حساب ائدیلن حماس قروپلاشماسی ایسلام جمهورییتی طرفیندن دستکله‌نیر. بو قروپ کئچن ایل ۱۵ مهرده اسرائیلین گونئیینه هوجوم ائده‌رک ۱۲۰۰ نفره یاخین آدامی اؤلدورموش، ۲۵۰-دن چوخ اینسانی دا گیروو گؤتورموشدو.
