ائیتیم یئتکیلیسی: اؤیرنجیلرین اوچده بیری‌نین اوخوماق و یازماق ساوادی یوخدور
ائیتیم آراشدیرمالاری انستیتوسونون بیر عضوو، ایرانلی اؤیرنجیلرین یوزده ۳۰ فایزی‌نین مینیموم ساوادلیلیق سويه‌‌سینه چاتمادیغینی سؤیله‌دی.
“مسعود کبیری” ۲۲ اسفند ۱۳۹۹ جوما گونو “تسنیم” خبر آژانسینا دئدی: “اؤلکه‌دکی چوخ سایدا اؤیرنجی مینیموم یئترلیلیگه صاحب دئییل و بو چوخ تهلوکه‌‌‌لیدیر؛ یعنی اؤیرنجیلریمیزین تخمیناً اوچده بیری عینی صینیفده اولان بیر اؤیرنجی قدر گؤزله‌دیگیمیز باجاریغی یوخدور. البتده کی، بو قریبه بیر شئی دئییل؛ مثلا، ریاضیاتدا دؤردونجو صینیفده دؤرد اساس حِسابلامانی بیلمه‌لیدیلر کی بونو دا بیلمیرلر.”
او آیریجا دئییب: “کئچمیشده بیر اؤیرنجی‌نین ان آزیندان اوخویوب یازماغی باجارمالی اولدوغو دئییلیردی، آمّا ایندی بعضی اؤیرنجیلر بیلمیر؛ یعنی دئمک اولار کی، هر اوچ طلبه‌‌‌دن بیری مینیموم ساوادلیلیق قابیلیتینه صاحب دئییل و بو بیر فاجعه‌‌‌دیر.”
سون ایللرده ائیتیم مودیرلیگی‌نین «هدیه‌های آسمانی»، «قرآن» و «پرورشی» کیمی دینی مؤوضولاری وورغولادیغینا دایر چوخ‌سایلی خبرلر یاییملاندی.
اؤتن ایلین دی آییندا ائیتیم ناظری‌نین موشاویری اوخوللاردا داها چوخ گنج اؤیرنجی‌نین اولدوغونو اعلان ائده‌رک دئدی: “علمی حوزه اؤیرنجیلرین دینی و اینانج ائیتیمینده ائیتیم ناظرلیگی‌نین قولودور.”
کئچن آی علمی حوزه و ائیتیم ایشبیرلیگی قرارگاهی‌نین کاتیبی علمی حوزه‌لرین رسمی اولاراق درسلیکلری یازما ساحه‌‌‌سینه باشلادیغینی سؤیله‌دی.
اؤتن هفته ائیتیم ناظری ئیتیم شاد شبکه‌سینده ۳۰۰ میندن چوخ دینی ایچریکلی کانالین فعالیت گؤستردیگینی اعلان ائده‌رک دئدی: “شاد شبکه‌سی اؤیرنجیلرین بیلگی مبادله‌سی اوچون اعتبارلی بیر اورتامدیر.”
iranwire
