ائیتیم شوراسی: اینگیلیس دیلینی اؤیرنمک ایستگه باغلیدیر و عرب دیلینی اؤیرنمک مجبوریدیر
ایرانین ائیتیم ناظرلیگی‌نین یئتکیلیسی اینگیلیس دیلی‌نین اؤیره‌نیلمه‌سی‌نین ایرانلی اؤیرنجیلر اوچون ایستگه باغلی اولدوغونو آچیقلاییب، لاکین عرب دیلی‌نین اؤیره‌نیلمه‌سی‌نین هله ده مجبوری اولدوغونو بیلدیریب.
عالی ائیتیم شوراسی‌نین عضوو “فاطمه رمضانی” بازار گونو، ۲۵ تیرده “تسنیم” خبر آژانسینا دئییب: اؤیرنجیلر بیرینجی و ایکینجی اورتا ائیتیم مدتینده خاریجی دیل اؤیرنمه‌لیدیرلر، لاکین بو دیل موطلق اینگیلیس دیلی دئییل.
رمضانی‌نین سؤزلرینه گؤره، اؤیرنجیلر اینگیلیس، فرانسیز، آلمان، ایتالیا، روس، ایسپان، چین و عرب دیللری آراسیندا سئچیم ائده بیلرلر.
رمضانی آیریجا ایران اوخوللاریندا عرب دیلی‌نین تدریسی ایله باغلی “تسنیمه” دئییب: بیرینجی و ایکینجی اورتا اوخولدا عرب دیلی‌نین قورآن دیلی اولدوغو اوچون تدریسی مجبوریدیر.
۱۳۹۵-جی ایلین اردیبهشت آییندا ایسلام جمهورییتی‌نین لیدری علی خامنه‌ای اینگیلیس دیلی‌نین تبلیغینده ایصرارلی اولماغی، ساغلام اولمایان شئی آدلاندیریب و دئییب: باشقا اؤلکه‌لرده خاریجی دیلین ائتکی و موداخیله‌سی‌نین و اینکیشافی‌نین قارشیسینی آلیرلار.
عینی زاماندا، او، بو چیخیشیندا بیلدیریب کی، ایسپان، فرانسیز، آلمان و دوغو اؤلکه‌لری کیمی باشقا دیللر ده علم دیلیدیر.
خامنه‌ای آیریجا بو چیخیشیندا دئییب: ایندی ایش او یئره چاتیب کی، اینگیلیس دیلی‌نین تدریسی اوشاق باغچالارینا دا کئچیب. بو آچیقلامالاردان سونرا ایرانین ائیتیم ناظرلیگی ایلک اوخول مکتبلرینده اینگیلیس دیلی‌نین تدریسینه قاداغا قویوب.
