آوروپا کمیسیونونون باشقانی اینقیلاب کئشیکچیلرینی ترور قروپو لیستینه آلینماسینی دستکله‌ییب
آوروپا کمیسیونونون باشقانی اورسلا فون درلاین، چارشنبه آخشامی، ۲۷ دی دئییب کی، او، اینقیلاب کئشیکچیلرینی ترور قروپو لیستینه آلینماسینی دستکله‌ییر.
آوروپا کمیسیونونون باشقانی ایسوئچره‌نین داووس شهرینده کئچیریلن دونیا اقتصادی فورومو چرچیوه‌سینده ژورنالیستلره دئییب: ایران رئژیمی‌نین اؤلکه‌نین اعتراضلارینا تپکیسی قدار اولوب و بو رئژیم ایلکل اینسان حاقلارینی پوزور.
خانیم فون در لاین وورغولادی: اصلینده بیز ایسلام جمهورییتینه قارشی تحریملرین یئنی مرحله‌‌‌سینی آختاریریق و من ده اینقیلاب کئشیکچیلری‌نین ترور قروپو لیستینه آلینماسینی دستکله‌ییرم. من ائشیتمیشم کی، آوروپا بیرلیگینده‌کی بیر نئچه خاریجی ایشلر ناظری‌نین بو طلبی وار و من اونلارین حاقلی اولدوغونو دوشونورم.
آوروپا کمیسیونونون باشقانی‌نین آچیقلاماسی ایرانلیلارین استراسبورگدا آوروپا پارلامئنتی قارشیسیندا اینقیلاب کئشیکچیلری‌نین ترور قروپو اعلان ائدیلمه‌سی مقصدی ایله کئچیریلن بؤیوک توپلانتیسیندان بیر گون سونرایا تصادوف ائدیر.
استراسبورگ پولیسی‌نین وئردیگی بیلگیلره گؤره، سایی‌نین ۱۲ میندن چوخ اولدوغو تخمین ائدیلن نومایشچیلر آوروپا پارلامئنتینی ایسلام جمهورییتی‌نین سون آیلاردا ایراندا نومایشچیلره قارشی زوراکیلیغینا قارشی باشقا قطعی آددیملار آتماغا چاغیریبلار.
آوروپا بیرلیگینه عضو اؤلکه‌لرله تهران آراسیندا موناسیبتلر سون آیلاردا نووه دانیشیقلارینی جانلاندیرماق چابالاری ایله پیسلشیب.
تهران بیر نئچه آوروپا وطنداشینی حبس ائدیب و آوروپا بیرلیگی اونون اعتراضچیلارا قارشی زوراکیلیقلا باسقیلارینی، او جومله‌‌‌دن اعداملاری گئتدیکجه داها چوخ تنقید ائدیر.
