آلتی سیاسی محبوس دؤیوله‌رک تک آداملیق هوجره‌یه کؤچورولوب
دادبانین خبرینه گؤره، ایکی گوندن چوخدور کی آلتی سیاسی محبوس اهوازین شیبان حبس‌خاناسیندا دؤیولدوکدن سونرا تک آداملیق هوجره‌یه کؤچورولوب.
«فواد چوبین»، «بهمن بهمنی»، «وحید عباسی»، «بهروز سلحشور»، «داوود مقامی» و «ایوب غیبی‌پور»، آدلی ۶ سیاسی محبوس شیبان حبس‌خاناسی معاونی حسن ذوالفقارین امری ایله دؤیولدوکدن سونرا هوجره‌یه سالینیبلار.
فعاللار اوچون مصلحت و حوقوقی ائیتیم مرکزی اولان دادبانین راپورونا گؤره، حبس‌خانا مامورو طرفیندن دؤیولن وحید عباسی‌نین بورنو قیریلیب. جناب عباسی مامورلارین گولـله‌لنمه‌سی سونوجوندا بیر گؤزونو ایتیرمیش و حبس‌خانادا موعالیجه حوقوقوندان محروم ائدیلمیش ایذه‌لی سیاسی محبوسدور.
بهمن بهمنی، وحید عباسی، بهروز سلحشور، ایذه‌لی اولان سککیز محبوسدان بیریدیر کی، موحاریبه و یئر اوزونده فساد اتهاملاری ایله اوزلشیرلر و روحی و فیزیکی دوروملاری پیسدیر.
ایوب غیبی‌پور ۲۲ آبان ۱۴۰۱-جی ایل ۲۲ آبان اهوازداکی ائوینه باسقین ائدن مامورلار اونو عائله عضولری‌نین گؤزو قارشیسیندا دؤیه‌رک حبس ائتدیلر و اینقیلاب محکمه‌‌سی طرفیندن ۳۵ ایل حبس جزاسینا محکوم ائدیلدی و تئمیزه گئتدیکذن سونرا بو جزا ۱۵ ایل اولاراق اویغولاندی.
بوندان اؤنجه ۱۶ یاشلی اعتراضچی و سون اعتراضلاردا ایذه‌نین قوربانلاریندان بیری اولان آرتین رحمانی‌نین آناسی هنگامه چوبین اینستاگرام صفحه‌‌‌سینده قارداشی فواد چوبینین اهوازداکی شیبان حبس‌خاناسی‌نین تک‌آداملیق هوجره‌سینه کؤچورولدویونو آچیقلامیشدی.
بو محبوسلار بو آغیر اتهاملارلا اوز-اوزه‌دیرلر، لاکین اونلارین هئچ بیرینه قارشی کیفایت قدر سند و ثبوت یوخدور و اونلار تهلوکه‌‌‌سیزلیک اورقانلاری طرفیندن اله ساختا پرونده یارادیلاراق موحاکیمه اولونورلار.
