آرمیتا پاویر ۲۲ آی ۱۷ گون حبس جزاسینا محکوم ائدیلیب
آذربایجان شهید مدنی بیلیم‌یوردونون قووولموش اؤیرنجیسی و مدنی و اؤیرنجی فعال آرمیتا پاویر توپلام ۲۲ آی ۱۷ گون حبس جزاسینا محکوم ائدیلیب.
خانیم پاویره گؤندریلن حؤکمه اساساً، بو آذربایجانلی اؤیرنجی فعال “رهبری تحقیر ائتمک” اتهامی ایله ۱۵ آی ۱ گون، “رژیمه قارشی تبلیغات” اتهامی ایله ایسه ۷ آی ۱۶ گون مدتینه آزادلیقدان محروم ائدیلیب.
آرمیتا پاویر ۱۵ آبان ۱۴۰۲-ده تبریز حبس‌خاناسیندان عائله‌‌‌سینه ائتدیگی زنگده قئیده آلینان سسلی فایلدا مامورلارین قئیری-قانونی داورانیشی سببیندن چوخلو آجلیق آکسییالاری کئچیردیگینی دئییر.
بو سس فایلین سونوندا آرمیتا پاویر دئییر کی، اونون هئچ بیر اساس خسته‌لیگی و یا روحی پوزغونلوغو یوخدور و اونون اوچون یارانا بیله‌جک هر هانسی پروبلئم بیرباشا یئتکیلیلرین و سیستمین مسوولیتی اولاجاق. خانیم پاورین ایشی دورغون اولاراق قالیر و کئچن ایلکی اعتراض آکسییالاریندا ایشتیراکینا گؤره پئشمان اولمادیغینا گؤره داوام ائتدیریلمیر.
آذربایجان شهید مدنی بیلیم‌یوردونون قووولموش اؤیرنجیسی و مدنی و اؤیرنجی فعال آرمیتا پاویر ۹ آبان ۱۴۰۱-ده کئچیردیگی اعتراض آکسییالاری زامانی بو بیلیم‌یوردو قارشیسیندا گوونلیک گوجلری ظرفیندن حبس ائدیلمیش و عینی ایلین ۱۷ آذر گونو ۲۵۰ میلیون تومن گیروو قارشیلیغیندا تبریز حبس‌خاناسیندان سربست بوراخیلمیشدی.
خانیم پاویر ۳۰ شهریور ۱۴۰۲-ده حبس ائدیله‌رک تبریز مرکزی حبس‌خاناسینا کؤچورولوب.
