آراز آمان تبریزده گوونلیک گوجلری طرفیندن حبس ائدیلیب

تورک مدنی فعال آراز آمان ۱۸ بهمن ۱۴۰۲ چارشنبه‌ گونو تبریزده گوونلیک گوجلری طرفیندن حبس ائدیله‌رک بلیرسیز یئره آپاریلیب.

بو مدنی فعالین یاخینلاری‌نین بیلدیردیگینه گؤره، ۱۶ بهمن بازار ائرته‌سی چوخ ساییلی سیویل پولیس بو مدنی فعالین آتاسی‌نین ائوینه گئدیب و زوراکیلیق ایله قاپی‌نین کیلیدینی سیندیراراق ائوه گیریبلر آنجاق اونو حبس ائده بیلمه‌ییبلر. داها سونرا چارشنبه‌ گونو حیات یولداشینی حبس ائتمک ایله هده‌له‌یه‌رک، اونو باشینی سیندیراراق حبس ائتمه‌یه نایل اولوبلار.

آراز آمانین تبریز شهرینده حبسی ایله آذربایجانین چئشیدلی شهرلرینده گوونلیک گوجلری طرفیندن حبس ائدیلن فعاللارین سایی ۱۰ نفره چاتیب.

هله‌لیک ساخلانیلان فعاللارین اتهاملاری و حبس سببلری بللی دئییل. ۱۷ بهمن ۱۴۰۲-ده تبریزده ساخلانیلان آیاز سیف‌خواه، باقر حاجی‌زاده و سعید جمالزاده چارشنبه‌ آخشامی گونو آخشام عائله‌‌‌لری ایله بیر دقیقه‌لیک قیسا صؤحبت زامانی تبریز اطلاعات ایداره‌سی‌نین تجرید‌خاناسینا کؤچورولدوکلرینی بیلدیردیلر.

هله‌لیک اردبیل، رشت، اورمیه، تبریز، اسلامشهر تهران و آستارا شهرلرینده تورک مدنی فعاللار مرتضی پروین، ودود اسدی، سالار طاهر افشار، باقر حاجی زاده، آیاز سیف خواه، سعید مینایی، کمال نوری وعبدالله واحدی ۱۶-۱۷-۱۸ بهمن ۱۴۰۲-ده گوونلیک گوجلری طرفیندن حبس اولونوبلار. حبس ائدیلن فعاللارین بعضی یاخینلاری بو فعاللارین حبس زامانی گوونلیک گوجلری طرفیندن دؤیولدویونو بیلدیریبلر.