آذربایجان شهرلرینده امکلیلرین اعتراض آکسییاسی
آذربایجان ایالتلریندن اولان بیر قروپ امکلی همدان، تبریز و زنجان شهرلرینده حؤکومتین اونلارین ایستکلرینه اؤنم وئرمه‌مه‌سینه اعتراض اولاراق اعتراض آکسییاسی کئچیریب.
۷ آذر ۱۴۰۲-جی ایل چارشنبه آخشامی همدان ایالتینده بیر قروپ امکلی اللرینده “بوتون وعدلری ائشیتدیک، آما عدالتی گؤرمه‌دیک”، “چالیشان و امکلی‌نین حوقوقلاری‌نین برابر‌لشدیریلمه‌سی آیریلماز حاقیمیزدیر” و… شوعارلار سسلندیریب و بنرلر داشییاراق میلی امکلیلیک فوندو بیناسی ایداره‌سینده توپلاشمیشدیلار.
دونن، بازار ائرته‌سی، ۶ آذر گونو تبریز و زنجاندا مخابرات امکلیلری دوغو آذربایجان و زنجان ایالتلری‌نین مرکزی مخابرات بیناسی قارشیسیندا ۱۳۹۸-جی ایل تاریخلی کادر و چالیشما قایدالارینا تام عمل اولونماماسینا و درمان سیغورتالاری پروبلئملری اعتراض اولاراق اعتراض آکسییاسی کئچیریبلر.
۱۳۸۵-جی ایلین اسفند آیینین قرارینا و ۱۳۸۹-جو ایلین اساسنامه‌سینه اساساً، مخابرات شرکتی‌نین ایشچیلری آنایاسی‌نین ۳۱-جی ماده‌‌سی‌نین ایجراسینا تابع اولمالی، اونا گؤره ایشچیلر امک ناظرلیگی‌نین تابعلیگینه وئریلمه‌لیدیر؛ آنجاق بو قانونون ایشچیلر اوچون حیاتا کئچیریلمیر و بو شرکتین ایشچیلری حساب ائدیرلر کی، اونلارین امک حاقی، سیغورتاسی، ریفاهی و امکلیلیکلری ایله باغلی قوراللارا حؤکومت نظارت ائدیلمیر و بو شرکتین ایشچیلری اؤز باشلارینا بوراخیلمیشلار.
امکلیلر اؤز آکسیالاریندا دفعه‌‌لرله آچیقلاییبلار کی، حوقوقلاری تام یئرینه گتیریلنه و حؤکومت اونلارین ایستکلرینی یئرینه یئتیرنه قدر توپلانتیلارینی داوام ائتدیره‌جکلر.
