آذربایجان دموکرات پارتیاسینین، مای آیینین بیری(اردیبهشتین ۱۱) فهله گونو مناسبتینه بیلدیرگهسی: مایآیینین بیری و اعتصابلارا دستک

آذربایجان دموکرات پارتیاسینین، مای آیینین بیری(اردیبهشتین ۱۱) فهله گونو مناسبتینه بیلدیرگهسی: مایآیینین بیری و اعتصابلارا دستک
نویوت(نفت)، گاز و پتروشیمی صنعتینین فهله لریندن حیمایت ائدیریک

دونیانین هر یئرینده مای آیینین بیری فهله گونو آدیلا تانینیر. کئچن ایل سیتمه، آیریسیچگیلییه معروض قالان بوتون قاتلارینین قالخیش ایلی اولدو. فهله لرده بو تاپدالانمیش کسیمین بوُیوک پارچاسی اولوب و اولماقدادیرلار.
دیققت ائتملی یئری بوراسیدیر کی، ایللردیر هر گون مرکزین مئدیالارینین گوُزوندن ایراقدا بو ظولوم و تاپدالانماق اولونوب و اولونور.
آنجاق دئولت اَلیله قتله یئتیریلن ژیناآدیلا (مهسا امینی) باشلانان قالخیش، باش کند تهراندا، باش وئرمهسی و برق کیمی هیزلا یاییلماسی، قاپساملی دالغایا دوُنوشوب، گنجلر، قادینلار، تاپدالانمیش میللتلر، او جومله دن ژینانین سویداشلاری( کوردلر ) و البته اونلارا دستک وئرن تورکلر، بلوچلار، عربلر، لرلار، گیلکلر، تورکمنلر و مازینی لر و س.، بیر کلمه ده، ایرانین بوتون میللتلرینی قاپسادی.

کسینلیکله، فهله لر، آیلیقچیلار، تقاعیدچیلر، فعال اوُیرنجیلر و مدنی توپلومون باشقا کسیملری، دئیلن قالخیشدا فعال حضورلاری واریدی.
حقیقتا بو بوُیوک وقاپساملی قالخیش، داغیناق صینیفسال و رفورمیستی طلبلر دئییلدیر.
“نیظام بوتونلوکده گئتمه لیدیر” سلوقانی قیرخ ایلدن چوخدور کی، سیتمه معروض قالمیش کسیملرین سلوقانی اولوبدور.
بو سلوقان بوتون کسیملری، دئوریمچیلر آدیندا، بیر اورتاق ایستک آلتیندا بیرلشدیریبدیر.

کئچن گونلرده، نووت و پتروشیمی صنعتلرینین فهلهلری، موزدلارینین آرتماماسینا گوُره اعتراض اوچون ” ۱۴۰۲ کامپانیاسی” عونوانلا، کارگاهلارینی ترک ائتدیلر. خبرلره گوُره هفته نین دوردونجو گونو(سه شنبه)، اردیبهشتین بئشینه جان، نوووت صنعتیله ایلگیلی اولان ۸۴ مرکزین فهله لری “۱۴۰۲ کامپاین”ا قوشولوبلار.
بئله لیکله آذربایجان دموکرات پارتیاسی مایین بیری، فهله لر گونونو عزیرلمکله یاناشی، معللیملرین صینفی کانونونا یوروشو محکوم ائدیر و ایراندا بوتون سیاسی و فهله زیندانیلارین چوخ تئز آزادلیقلا بوراقمالارینی ایستییر. و همچنین نووت، گاز و پتروشیمی صنعتینین فهله لرینین دورومو و موزدلارینین آزالماسیندان نیارانچیلیغینی بیلدیریر.

آیریجا، فهله لرین اوُز حاقلارینا چاتماق اوچون، اعتصابا قاتیلماقلارینی، اونلارین طبیعی حاققی ساییر.
بیز، بوتون قووه مییزله” ۱۴۰۲ کامپانیاسینا” قاتیلان نووت، گاز و پتروشیمی صنعتینین فهله لرینی دستکلهیب و بوتون تلاشیمیزی، اونلار عدالتله حاقلارینا چاتانا کیمی ائده جییک.

یاشاسین بر مای ( ۱۱ اردیبهشت) دنیا فهله و اشچیلر گونو

آذربایجان دموکرات پارتیاسی
28.04.23