آذربایجانلی مدنی فعالی زینال تنهایی حبسه قارشی جریمه اؤده‌مه‌یه محکوم ائدیلدی
تبریزده یاشایان آذربایجانلی مدنی فعال زینال تنهایی، تبریز اینقیلاب محکمه‌‌سی‌نین اوچونجو شؤبه‌سی طرفیندن ۳ میلیون تومن جریمه اؤده‌مه‌یه محکوم ائدیلدی.
بو حؤکم، تبریز اینقیلاب محکمه‌‌سی‌نین اوچونجو شؤبه‌سی طرفیندن حاکم فتح‌نژادین باشقانلیغی ایله وئریلیب و جناب تنهایی‌نین وکیلی اصغر محمدی‌یه شیفاهی شکیلده بیلدیریلیب.
بو شؤبه اوفیسی طرفیندن وئریلن بیلگییه گؤره، جناب تنهایی رژیمه قارشی تبلیغات اتهامی ایله ۳ آی حبس جزاسی‌نین قارشیلیغیندا ۳ میلیون تومن جزایا محکوم ائدیلدی.
بو آذربایجانلی فعال ۱۳ مهر ۱۳۹۹-دا گوونلیک گوجلری طرفیندن توتولما امری و یا محکمه قراری اولمادان حبس ائدیلمیشدی.
حبس زامانی گوونلیک گوجلری حیات یولداشی‌نین جیب تلفونو دا داخیل اولماقلا دیگر عائله عضولری‌نین شخصی اشیالاریندا آختاریش آپاردیلار و نهایت محکمه‌‌نین سونونا قدر اونو ۵۰۰ میلیون تومن گیروو قارشیلیغیندا سربست بوراخدیلار.
خاطیرلاداق کی، باشقا بیر آذربایجانلی مدنی فعال اولان علی خیرجودا شخصی اینستاگرام صفحه‌‌‌سینده اردبیل عومومی و اینقیلاب ساوجیلیغی‌نین ۱۰ سایلی شؤبه‌سی‌نین بو اردبیل‌لی مدنی فعالدان ۵ گون ایچینده بیر وکیل اولماسی ایمکانی ایله بو شهرین اطلاعات ایداره‌سینده حاضر اولماسی اوچون بیر بیلدیریش گؤندردیگینی آچیقلادی.
قاراباغ ساواشی زامانی گوونلیک گوجلری طرفیندن شخصی ائوینده توتولان علی خیرجو بو ایلین آذر آییندا اردبیل جینایت محکمه‌‌سی‌نین ۱۰۰ سایلی شؤبه‌سی طرفیندن “ایغتیشاشلار یاراتماقلا اجتماعی آسایشی پوزماقدا ایشتیراک ائتمک” اتهامی ایله دؤرد آی حبس و ۲۰ شاللاق جزاسینا محکوم ائدیلدی.
بو ایلین تیر آییندا سوسیال شبکه‌لرده آذربایجان جمهوریییتینه دستک و ایسلام جمهوریییتی و روسیانین ارمنیستانا دستک سیاستینه اعتراض چاغریشلاریندان سونرا آذربایجانین موختلیف شهرلرده کئچیریلن اعتراض میتینقلرینده بیر چوخ مدنی فعال حبس اولوندو.
iranwire
