آذربايجان دئموکراتيک بيرليگي-بيرليکين بياناتي: ايراندا مکتبلرين آچيلماسينين ايلک گونو
هر ايل اولدوغو کيمي بو ايلده ايراندا مئهر آيينين 1-ايند،ميليونلارلا اوشاق آنا ديلينده يوخ بلکه فارس ديلينده مکتبه باشلاماق مجبوريتينده اولاجاق. ايکي ديللي اوشاقلار ( سيز تورک، کورد، عرب، بلوچ، لور، …اوشاقلار اوخويون)، کي ايران رئژيمين طرفيندن دفعه لرله تائيد اولوبدور کي آزي مکتبليلرين 70% -ني تشکيل ائديرلر، تاسوفله اؤز مئنتال و طبيعي تحصيل و بسلنمه پروسئسيني طبيعي شکيلده ياني اؤز آنا ديللرينده داوام ائده بيلمه حاقينا ماليک دئييللر.
ايندي سوال بودور کي گؤره‌سن آنا ديلي تحصيلي و اوشاقلارين طبيعي اينکيشاف پروسئسي ايمکاني نه زامان تورک، کورد، عرب، بلوچ، لور، … اوشاقلارينا دا وئريله‌جک؟ گؤره‌سن اونلار نه زامانا قدربوتون مکتبدن اؤنجه کي دئورده اولان حياتلاريندا توپانان سؤزجوک و آنلاملاري کي آنا ديلي کدلاريندا ييغيلميشدير مکتبده گيرديکده مکتب داروازاسينين آرخاسيندا قويماييب و حتّي تدريجن اونودماغينا محکوم اولماييب، بلکه غورورلا اؤزلريله زنگين خزينه کيمي درس باشينا و تحصيل اوجاقلارينا آپارا بيله‌جکلر؟و نه واختا قدر اونلار فارس رقيبلري و يا داها دوغروسو فارس اولان صينيف يولداشلاري ايله حاقسيز بير رقابته گيره‌رک مکتبه باشلاماليديرلار؟
اوشاق پسيخولوگياسيندان و اونون مووفقيتلي تحصيل تجروبه‌لري ايله تحصيل سيستئمينده بيرلشديريلمه‌سينين ضروريليگيندن خبرسيز اولان صلاحيتسيز ايران تحصيل سيستئمي باشچيلاري، عئيني زاماندا ”بیرلشمیش میللتلر بیرلیگی“ عوضو دؤولتلرينين رعايت ائتمه‌لريني طلب اولونان تمل اينسان حاقلارينا حؤرمت ائتمک وضعيفه‌سيندن گويا خبرسيز وضعيفه صاحيبلري، نهايت بو ايل فارس اولمايان اوشاقلارين مکتبلرده جيدي پروبلئملر ياشاماسينا اعتيراف ائديبلر و بونون حلي اوچون اؤز گئري قالميش و کؤهنه باخيش آچيلاريندان يوللار آختارميشلاردير. بو آختاريش نتيجه‌سينده اوشاقلارا جانسيز اشيا کيمي و حربي عسکرلر کيمي اوتانج وئريجي باخيشلا”فارس ديلي قابيليتينين يا يئترليليگينين تئستي” آديندا بير لايحه اورتايا آتيبلار کي، اونون پيسليگي حتّي موختليف پارلامئنتلرده و عيالتلرده سيستئمين بعضي مأمورلارينين سسلريني بئله چيخارتميشدير. بو آختاريشين نتيجه‌سي عليل و گئريله‌ين ذهنيت دولو پروقراملارين ديزاينئرلرينين لايحه‌سي “ايبتيدايي مکتبده فارس ديليني اوشاقلارين ذهنينه يئريتمکده گئج قاليريقسا،او حالدا بيزده اوشاق باغچاسينا گيرمه‌ميشدن ده ايللر اول بو عملياتا باشلاياجايق!” , سالديرقان تئوريسي و تکليفي اولوبدور. باشقا سؤزله، عاييله لرينين و قوهوملارينين قوجاغيندا عاغيللاريني اينکيشاف ائتديرن، خاريجي دونيا و داخيلي يا مئنتال دويغولاري ايله تانيش اولان و بونو اؤز آنا ديلينده اينکيشاف ائتديرن اوشاقلارين بو طبيعي پروسئسيني 4 ياشيندان دايانديريب و اوشاغين ” واليدئين لر ايله باغلانتي قورماق و امنييتلي اوشاقليق موحيطيني قورماق” نظريييه‌سينه کسکين ضيد اولاراق اونلاري خاريجي ديل و ادبيات ايله ياد آداملارلا واخت کئچيرمه‌يه مجبور ائده‌جکلر. بو فابريکين محصولو عاييله سين، آتا و آناسينا و کئچميشينه مؤحکم باغلي اولمايان هؤويت بؤحرانيندا چابالايان بير شخصيت اولاجاقدير.
ماراقليدير کي، ميقراسييا زاماني ” هؤويت بؤحراني” ندان ازيت چکن و بعضاً پئشه و آکادئميک اوغورلارينا باخماياراق, اينسان کيمي اينکيشاف ائده بيلمز دوروما دوشن شخصلر، اصلينده قاچقين يا موهاجير اولماقين و ياد موحيطه ياد ديلين واسيطه‌سيله قيسمن باشکا مدنيته اييله‌نيب آما عؤمور بويو کيمليک بؤحرانيندا ازيت چکمک، موهاجيرتين بير جيدي منفي نتيجه‌لريندن دير. بو پروبلئملر چاغيميزدا اوشاق پسيخولوگياسينين آيريجا بير قولونا چئوريلن “ميقراسيا و اوشاق پسيخولوگياسي” مؤضوع سوندا بير اؤزونه مخصوص آراشديرما ساحه سي اولان بير قونودور.
فارس اولمايان ديگر ميلتلر يني تورکلر، کوردلر، عربلر، بلوجلار، لورلار… ايراندا موهاجير يوخ بلکه اؤز فارس وطنداشلاري يا هموطنلري ايله برابر حوقوقلارا صاحيبديرلر. بيز چوخ ديللي تحصيل سيستئميني يونئسکو-نون بو پروبلئملردن يئگانه چيخيش يولو حساب ائتديگي چوخ ميلتلي اؤلکه‌لر اوچون ان اويغون اولان چيخيش يولو حساب ائديريک.
آذربايجان دئموکراتيک بيرليگي – بيرليک اولاراق، ايرانداکي تک ديللي و توتاليتار تحصيل سيستئميني بير داها قيناييريق و “فارس ديلي قابيليتينين يا يئترليليگينين تئستي” کيمي اورتا عصرلره عاييد پروقراملارين لغو ائديلمه‌سيني و بئله‌ليکله فارس اولمايان 70% مکتبلي اوشاقلارين روحونون، ذهنيتينين و طبيعي اينکيشاف پروسئسينين آچيق شکيلده پوزولماسيناسبب اولان بئله دوزنلرين ييغيشيلماسيني طلب ائديريک.
آذربايجان دئموکراتيک بيرليگي – بيرليک
9 سئنتيابر 2019
