۱۶ یاشلی یئنی یئتمه سونیا شریفی اوچون محاریبه حؤکمونون وئریلمه‌‌سی ناراحاتلیق یارادیب
۱۶ یاشلی یئنی‌یئتمه و اورتا مکتب ایکینجی کورس اؤیرنجیسی “سونیا شریفی” آبدانانداکی ننه‌سی‌نین ائوینده گوونلیک گوجلری طرفیندن حبس ائدیلیب. دئییلنه گؤره، گوونلیک گوجلری اونو حبس ائدرکن شدتلی دؤیوب، سونرا ایسه ایلام اصلاح مرکزینه کؤچوروبلر.
هنگاو حوقوق مودافیه تشکیلاتی بو ۱۶ یاشلی قیزین ایلام مرکزی حبس‌خاناسی‌نین قادین شؤبه‌سینه کؤچورولمه تاریخینی ۲۸ آبان اولاراق قئید ائدیب.
هنگاو آیریجا گوونلیک موستنطیقلری‌نین سونیا شریفی‌نی مولوتوف کوکتئیلی حاضرلادیغینی و شوعار یازدیغینی اعتراف ائتمه‌یه مجبور ائتدیگینی، آبدانان و ایلام عومومی ساوجیلیغی ایسه عائله‌‌‌یه دورومو ایله باغلی اطرافلی جاواب وئرمه‌دیگینی بیلدیریب. بو مدت ایچینده اونلار بو پرونده‌یه وکیل قبول ائتمکدن ایمتینا ائده‌رک، اونون اتهامینی موحاریبه اعلان ائدیبلر.
آیریجا ائیتیم ایشچیلری بیرلیگی تشکیلاتلاری‌نین کوردیناسیون شوراسیکانالی سونیا شریفی‌نین اوغورلانماسیندان ایکی آی سونرا هله ده اینقیلاب کئشیکچیلری طرفیندن ساخلانیلدیغینی و ۱ میلیارد تومن گیروو قویولماسینا باخمایاراق، اصلاح مرکزینه گؤندریلدیگینی بیلدیریب. سونیانین عائله‌‌‌سی گیروو اؤده‌یه بیلمه‌دیگی اوچون ایسه اونو آزاد ائده بیلمه‌ییب.
آلمانییا مسیحی دموکرات پارتییاسی‌نین نوماینده‌‌سی کاتیا لیکرت سونیا شریفی ایله باغلی بو خبری آچیقلادیقدان سونرا بو ۱۶ یاشلی قیزین سیاسی ضمانتینی اؤز اوزرینه گؤتوردویونو آچیقلاییب. کاتیا لیکرت توییتر حسابیندا یازیب: سونیا شریفی بیر آی اؤنجه ایران رژیمی طرفیندن حبس ائدیلیب. من اونون سیاسی کفالتینی اؤز اوزریمه گؤتوردوم و اونون سربست بوراخیلماسینا تعهدوم وار.
#عومومی_اعتراضلار #سونیا_شریفی
