پولیتیکو: ایران، آمریکانین گونئی آفریقاداکی سفیرینه سوءقصد حاضرلیغی آپاریردی
ایرانین تبکیسینه دایر بو خبرین سون پاراگرافی یئنیلندی.
آمریکانین «پولیتیکو» قزئتی، ۲۳ شهریور ۱۳۹۹-جی ایل بازار گونو، آدینین آچیقلانماسینی ایسته‌مه‌ین بیر آمریکا مقامینا ایستیناد ائده‌رک، ایران حؤکومتی‌نین آمریکانین گونئی آفریقاداکی سفیرینه سوءقصد پلانی اولدوغونو بیلدیردی.
معلوماتا گؤره، آمریکانین گونئی آفریقاداکی سفیری لانا مارکسا سوءقصد پلانی آمریکا قوه‌لری طرفیندن قاسم سلیمانی‌نین اؤلدورولمه‌سی‌نین قیصاصی اولاراق پلانلاشدیریلیب. «ایسلام اینقیلابی کئشیکچیلری‌نین خاریجی قولو اولان قدس گوجو کوماندیری قاسم سلیمانی»، ۱۳ دی ۱۳۹۸-ده بغداد هاوا لیمانی یاخینلیغیندا آمریکایا مخصوص اینسانسیز اوچاقلارین اونوندا یئر آلدیغی کاروانا ائتدیگی هوجومدا اؤلدورولدو.
ایرانین بو اینتیقام پلانینا دایر معلوماتلار آمریکا جاسوسلوق اورقانلاری‌نین یئنی بیر راپوروندا ایضاح ائدیلدی.
خبرلر آمریکادا جمهورباشقانلیغی سئچکیلریندن بیر نئچه هفته اؤنجه گلیر و بو جور حرکتلرین اوغورو دونالد ترامپی سئچکی عرفه‌‌سینده قیصاص آلماغا سؤوق ائده بیلر.
پولیتیکویا گؤره، ایران حؤکومتی ایللردیر گونئی آفریقادا گیزلی شبکه‌لر اورگانیزه ائدیر. ۲۰۱۵-جی ایلده، الجزیره و گاردین، گونئی آفریقاداکی ایرانین اطلاعات شبکه‌لریندن، او دؤورده سیزان جاسوسلوق راپورلارینا اساسلاناراق معلومات وئردیلر.
۶۶ یاشلی «لانا مارکس»، آمریکانین گونئی آفریکاداکی سفیرلیگینی بیر ایلدن آز مدتدیر ایداره ائدیر. خانیم مارکس ۲۰ ایلدیر دونالد ترومپ ایله دوستدور و پولیتیکویا گؤره بو، اونو اینتیقام آلماق اوچون یاخشی بیر هدف حالینا گتیره بیلر.
ایسلام جومهوریییتی مقاملاری اؤنجه‌لر قاسم سلیمانی‌نین اؤلدورولمه‌سی اوچون جدی اینتیقام آلاجاقلارینی بیلدیرمیشدیلر.
ایران ایسلام جمهوریییتی‌نین خاریجی ایشلر ناظرلیگی‌نین سؤزچوسو سعید خطیب‌زاده پولیتیکو راپورونو «ترامپ یؤنتیمی‌نین ایرانا قارشی عکس جاسوسلوق کامپانییاسی‌نین بیر حیصه‌‌‌سی» آدلاندیراراق رد ائتدی.
