پلیس قووه لرینین کوماندیری مهسا امینی ایله فیزیکی تماسی اینکار ائدیب

انتخاب خبر آژانسی‌نین وئردیگی بیلگیلره گؤره، پولیس کوماندیری، هاشم حسینی بوشهری و حسین نوری‌همدانی ده داخیل اولماقلا، بیر سیرا تقلید مرجعلری و قوم روحانیلری ایله گؤروشده دئییب: مهسا امینی‌نین اؤلومونده پولیس قوه‌لرینه قارشی هئچ بیر گوناه و یا قصور یوخدور.

حسین اشتری دئییب: آراشدیرمالارا گؤره، سیزی امین ائدیریک کی، مهسا امینی‌نین اؤلومو ایله باغلی هئچ بیر فیزیکی تماس اولماییب.

بو گؤروشلرده اشتری پولیسین حرکتلرینی دستکله‌ییب و بیلدیریب: پولیس خالقین املاکینا باسقین ائدن، عومومی املاکی تالایان، آسایشی پوزماق نيتینده اولانلارلا موباریزه آپارا بیلدی.

اؤنجه‌لر اونون باشیندان وورولما و اونا فیزیکی تضییق گؤستریلمه‌سی ایله باغلی بیر نئچه ثبوت درج ائدیلمیشدی.

مهسا (ژینا) امینی‌نین پولیس نظارتینده اؤلمه‌سیندن سونرا قارداشی ایران‌وایره دئمیشدی: من اؤز گؤزلریمله گؤردوم کی، مهسا‌نین اوزو شیشیب و آیاغی گؤیریب.

مهسا امینی‌نین کسری خسته‌خاناسیندا شکیللری‌نین یاییملانماسی ایله حکیملر اونون گؤزونون آلتینداکی شیشمه و قولاقلاریندان آخان قان ایزلرینه دقت چکرک، بونو اونون باشینا وورولان ضربه‌‌‌نین علامتی حساب ائدیبلر.

آیریجا، مهسا امینی‌نین کله‌‌ سومویونون توموقرافی‌سی‌نین شکیللری درج ائدیلدیکدن سونرا حکیملر اونون باشیندا سینیق اولدوغونو بیلدیریبلر.

مهسا امینی‌نین سقزده دفن ائدیلمه‌سیندن و اونون اؤلومونه قارشی اعتراضلارین باشلاماسیندان سونرا گوونلیک اورقانلاری مهسانین عائله‌‌‌سینه تضییق ائده‌رک اونون اورک خسته‌لیگی‌نین اولدوغونو اعتراف ائتمه‌سینی ایسته‌میشدیلر. مهسانین آتاسی ایسه ایلک باشدان اونون هر هانسی خسته‌لیگینی و باشیندان عملیات اولوندوغونو اینکار ائدیب.
#عومومی_اعتراضلار #مهسا_امینی