واثقی قارداشلاری اردبیل مرکزی حبس‌خاناسی‌نین ۱۳ سایلی بندینه کؤچورولدولر
اردبیل مرکزی حبس‌خاناسیندان آلینان بیلگیلره گؤره، ایکی آذربایجانلی مدنی فعال علی و رضا واثقی ۳ تیر ۱۴۰۰-ده اردبیل مرکزی حبس‌خاناسی‌نین ۱۳ ساییلی بندینه (اؤنجه‌کی بندلرینه) قایتاریلدیلار.
واثقی قارداشلاری، آذربایجانلی سیاسی محبوس جناب لسانی‌یه دستک اولاراق آجلیق آکسییاسی کئچیرن عباس لسانی، مهرداد شیخی و یوسف کاری ایله بیرلیکده آجلیق آکسییاسینا باشلادیلار و درحال قرنطینه بندینه گؤندریلدیلر. آجلیق آکسییاسیندان سونرا رضا واثقی ۷-جی بنده (گوونلیک بندی)، علی واثقی ایسه مهرداد شیخی ایله بیرلیکده ۲-جی بنده کؤچورولدو.
رضا واثقی و قارداشی علی واثقی، کئچن ایلین آبان آییندا محکمه مامورلاری طرفیندن توتولدولار و “گئجه بیلدیریشی (شبنامه) چاپ ائتمکله اؤلکه‌نین میلی گوونلیگینه قارشی جینایت تؤرتمک گیریشیمینده گیزلی ال بیر اولماق و رژیمه قارشی تبلیغات آپارماق” اتهامی ایله ایکی ایل حبس جزاسینا محکوم ائدیله‌رک اردبیل مرکزی حبس‌خاناسینا کؤچورولدولر.
واثقی قارداشلار مامورلار طرفیندن حؤکم گؤستریلمه‌دن ۲۱ خرداددا ایش یئرلرینده دؤیوله‌رک توتولدولار و ۲۷ خرداددا محکمه‌‌نین سونونا قدر هر بیری ۱۱۰ میلیون تومن گیروو قارشیلیغیندا سربست بوراخیلدیلار. بو ایکی قارداش، سربست بوراخیلدیقدان سونرا گوونلیک گوجلری طرفیندن دؤیولدوکلرینی و بدنلرینده‌کی دؤیولمه ایزلرینی گؤسترن شکیللرینی سوسیال شبکلرده یایملادیلار.
بو ایکی قارداشین ایش یئری ده ۲۲ خرداد جوما آخشامی اطلاعات مامورلاری طرفیندن آختاریلدی و بو آختاریشدا جیب تلفونلاری و بیلگی‌سایارلاری دا داخیل اولماقلا بیر سیرا شخصی اشیالارینا ال قویولدو.
iranwire
