هرانا بو ایلین شهریور آییندا ایراندا ۵۲ نفرین اعدام ائدیلدیگینی آچیقلاییب
هرانا بو ایلین شهریور آییندا ایراندا ۵۲ نفرین اعدام ائدیلدیگینی آچیقلاییب
هرانا سایتی ایراندا اینسان حاقلاری‌نین پوزولماسی ایله باغلی سون آیلیق رائوروندا بو ایلین شهریور آییندا ایران حبس‌خانالاریندا ان آزی ۵۲ نفرین آسیلدیغینی یازیب.
بو مدت ایچینده ایسلام جمهورییتی‌نین محکمه سیستمی ۱۴ نفره اعدام حؤکمو چیخاریب، داها دؤرد نفرین اعدام حؤکمونو تصدیقله‌ییب.
ایران اینسان حاقلاری فعاللاری‌نین خبر اورقانی ۱ مهرده یایدیغی راپوروندا شاهرود شهرینده بیر محبوسون آچیق الاندا اعدام ائدیلمه‌سی و محمدجواد وفایی‌ثانی، بهروز احسانی و مهدی حسنی آدلی اوچ سیاسی محبوسا اعدام حؤکمو وئریلمه‌سی ایله باغلی خبر یاییب.
مشهدلی بوکسچو و ۱۳۹۸-جی ایلین آبان آییندا کئچیریلن اعتراض آکسییالاری زامانی حبس ائدیلن سیاسی محبوس وفایی ثانی مشهد اینقیلاب محکمه‌‌سی طرفیندن “یئر اوزونده فساد” اتهامی ایله اوچونجو دفعه اعدام جزاسینا محکوم ائدیلیب.
اوین حبس‌خاناسیندا حبسده اولان سیاسی محبوسلار بهروز احسانی اسلاملو و مهدی حسنی ده تهران اینقیلاب محکمه‌‌سی طرفیندن اعدام جزاسینا محکوم ائدیلیب.
هرانا داها اؤنجه بو ایلین مرداد آییندا ان آزی ۱۰۶ محبوسون اعدام ائدیلدیگینی آچیقلامیشدی.
اینسان حاقلاری تشکیلاتلاری‌نین یایدیغی بیلگیلره گؤره، بو ایلین باشیندان ایران حبس‌خانالاریندا ۱۵ نفری قادین اولماقلا ۴۳۸-دن چوخ آدام آسیلیب.
