نوید افکاری‌نین باجیسی الهام افکاری حبس ائدیلیب
نوید افکاری‌نین قارداشی سعید توییتر صفحه‌سینده یازیب کی، باجیسی الهام افکاری شیرازدا حبس ائدیلیب. او، الهامین حیات یولداشی و اوشاغی‌نین دوروموندان خبرسیز اولدوقلارینی دا وورغولاییب.
بو اینقیلاب کئشیکچیلرینه باغلی تسنیم خبر آژانسی‌‌نین آیرینتیلارا ایستیناد ائتمه‌دن و سندلر تقدیم ائتمه‌دن “الهام افکاری‌نین ایران اینترنشنالین اساس عامللریندن بیری اولدوغونو” ادعا ائتدیگی بیر واختدادیر.
تسنیم آیریجا نوید افکاری‌نین باجیسی‌نین سرحدن قاچارکن حبس اولوندوغونو یازیب.
گنج شیرازلی گولشچی نوید افکاری ۱۳۹۷-جی ایلین مرداد اعتراضلاریندان سونرا حبس ائدیلمیش، سونرا ایسه شیراز سو و کانالیزاسیون شرکتی‌نین گوونلیک ایشچیسینی اؤلدورمکده اتهام و موحاکیمه ائدیله‌رک اعدام ائدیلمیشدیر.
بو بلیرسیز ایشده نویدین باشقا ایکی قارداشی وحید و حبیب افکاری ده حبس ائدیلیب.
الهام افکاری بوندان اؤنجه قارداشی‌نین اعدامی‌نین ایکینجی ایلدؤنومو ایله عینی واختدا بیر نئچه ساعت ساخلانیلمیشدی.
#عومومی_اعتراضلار #الهام_افکاری
