مولوی عبدالحمید: هئچ بیر حؤکومت سلاح گوجو ایله آیاقدا قالا بیلمز
زاهیدانین سونی جوما ایمامی مولوی عبدالحمید بو شهرده‌کی جوما نمازیندا تنقیدی خوطبه‌‌لرینی داوام ائتدیره‌رک، حاکیميتدن اینسانلارین ایستکلرینه دقت یئتیرمیی طلب ائدیب و دئییب کی هئچ بیر حؤکومت و حؤکومت سیستمی سلاح گوجو ایله ساخلانیلا بیلمز.
او، بیر داها عالیملره . گوونلیک گوجلرینه خالقین قارشیسیندا دایانماماغی تؤوصیه ائده‌رک، زاهیدانین قانلی جوما گونونه ایشاره ائتدی و دئدی: محکمه بیزی امین ائتدی کی، بو مسئله‌‌‌یه طرفسیز باخاجاق، آما ایندی ائشیدیریک کی، دئییرلر، بیز هئچ کیمی جزالاندیرا بیلمریک، چونکی او واخت کیمین کیمه گولـله آتدیغی بللی دئییل و حاکملرین سؤزونه تعجبله‌نیریک.
ایرانین بو یوکسک روتبه‌لی سونی روحانیسی چیخیشیندا دئییب: نئجه اولدو کی، مامورون قاتیلینی تئز بللی ائدیب و ایکی نفردن قیصاص آلدینیز، آنجاق قاتیل مامورلاردان بیری اولاندا اونو تاپماق اولمور. بو تعجبلودور.
جناب عبدالحمید بیر داها وورغولادی کی، بو ایالتین اهالیسی تکجه بو جینایتی تؤره‌دنلرین جزالاندیریلماسینی دئییل، هم ده بو گولـله‌لنمه‌لره گؤستریش وئرنلرین جزالاندیریلماسینی ایسته‌ییر. او، آیریجا آرتیردی: بیرلشمیش ملتلر اینسان حاقلاری بو یاخینلاردا سربست بوراخیلان محبوسلارلا باغلی شوک راپور یاییب. آزادلیغا چیخان بو محبوسلار دا بیزه راپور وئریبلر. پوزونتو تؤره‌دن مامور ایشگنجه وئریر و اعتراف ائتمه‌یه مجبور ائدیر. بونلارین هامیسی قانونی اولاراق جزالاندیریلمالیدیر.
یئرلی قایناقلاردان آلینان خبرلره گؤره، بو جوما نمازی اؤنجه‌کی هفته‌لرده اولدوغو کیمی زاهیدان موصلاسیندا دا جدی گوونلیک اورتامی و سیویل گئییملی مامورلارین مؤوجودلوغو ایله موشایعت اولونوب. جوما نمازیندان سونرا کوچه‌یه توپلاشان اینسانلار ایسلام جمهورییتی و اونون لیدری علی خامنه‌ای‌یه قارشی شوعارلار سسلندیریبلر.
