قوشاچایلی اوشاق سو کانالیندا بوغولوب
قوشاچای بلدیه‌سی‌نین یانغین‌سؤندورمه ایداره‌سی و گوونلیک خیدمتلری‌نین رئیسی دئییب: قوشاچای‌ین بکتاش شهرینده اوچ یاشلی اوشاق سو کانالینا دوشه‌رک بوغولوب.
سامان محمدی بونونلا باغلی دئییب: آناسی ایله سو کانالی‌نین یانینا گلن و آناسی قوناقلارلا صؤحبت ائدرکن ایلنن اوچ یاشلی اوشاق کانالا دوشوب.
او آرتیریب: اینسانلارین چاباسی ایله اوشاغی سودان چیخاریبلار، لاکین اونون سو کانالینا دوشمه‌سیندن چوخ واخت کئچدیگینه گؤره اونون دورومو موساعید اولماییب.
قوشاچای بلدیه‌سی‌نین یانغین‌سؤندورمه ایداره‌سی و گوونلیک خیدمتلری‌نین رئیسی دئییب: قورتاریجی تیم و یئرلی اهالی‌نین بو اوشاغین حیاتینی قورتارماق جهدلری سونوجسوز قالیب و تأسف کی، اوشاق آتا آناسی‌نین اهمالی‌نین قوربانی اولوب.
او، بعضی اینسانلارین هاوالارین ایستیلشمه‌سی ایله چایا و سو کانالینا چیممه‌یه گئتدیگینه دقت چکیب و دئییب: وطنداشلار مومکون قدر چایلاردا، اؤزللیکله ده تانیش اولمایان یئرلرده چیممکدن چکینمه‌لی، چایلاردا، بندلرده، سو کاناللاریندا بوغولما ریسکی‌نین جدی اولدوغونو بیلمه‌لیدیرلر.
