صحیه ناظرلیگی: تهران، اؤلکه داخیلینده کرونا خسته‌لیگی‌نین یاییلما منبعییدیر
3 و 4 مرداد (24 و 25 ژوئیه)
رسمی ایستاتیستیکایا گؤره، ایراندا سون 48 ساعت عرضینده 410 نفر کرونا خسته‌لیگیندن اؤلدو و رسمی تشخیص قویولان خسته‌لرین سایی 289 مینه چاتدی و حسن روحانی «ایمام حسین ماتمی‌نین» شهرده اولماسیندان آسیلی اولمایاراق هر یئرده کئچیریلمه‌لی اولدوغونو آچیقلادی. ایستر کندده، ایستر قیرمیزی، ایسترسه ده آغ اولدوغو یئرده. صحیه ناظری‌نین معاونی تلویزیونداکی دانیشیقیندا تصدیق ائتدی کی، اؤلکه‌ده ماسکه‌لرین ایستیفاده‌سی توپلام 55 فایزدیر و خسته‌لیگی ایداره ائتمک اوچون 95 فایزه چاتمالیدیر و محرم ماتمی‌نین تهلوکه‌‌‌سیزلیک و ساغلاملیق پرینسیپلرینه اویغون اولاراق «موطلق» کئچیریلمه‌لیدیر.
ایراندا، سوسیال محدودیتلر داوام ائدرکن و موختلیف ایالتلرین مسوول‌لاری اینسانلارا ائولرینده هر هانسی بیر توپلانتی، حتی توی و یاس کئچیرسه قانونی جزا ایله اوزلشه‌جکلری باره‌ده خبردارلیق ائدیرلر. یاس مراسیملری هر یئرده، شهرده و کندده، قیرمیزی و یا آغ وضعیتده اولسون، کئچیریلمه‌لیدیر، لاکین ماتم واختی ایداره اولونا بیلر و ماتم واختینی دؤرد-بئش گونه محدودلاشدیراراق کرونانین یاییلماسینی اؤنله‌مک اولا بیلر.
روحانی، «هئچ بیر ساغلاملیق و ماتم ایکیلیگیمیز یوخدور» آدلی آنلامسیز بیر بیاناتلا، هئچ کیمین علم و دین آراسینداکی بوشلوغو کؤرپو ائده بیلمه‌دیگینی سؤیله‌دی. بیز هم علمدن همده دیندن ایستیفاده ائدیریک نئجه کی رمضان آییندا دینی مراسیملرین کئچیریلمه‌سی کرونانین یاییلماسینا سبب اولمامیشدیر.
صحیه ناظری‌نین معاونی «ایرج حریرچی» خبر شبکسینه وئردیگی موصاحیبه‌ده تهراندا یئنی خسته‌خانایا یئر‌لشدیرمه ساییسینین 600 نفره قدر آرتماسینا ایشاره ائده‌رک، تهرانین ایندی بوتون اؤلکه‌ده یاییلان خسته‌لیک منبعیینه چئوریلدیگینی آچیقلادی. او خالقین ساغلاملیغینا وئردیکلری اؤنمی گؤسترمه‌یه چالیشسا دا «آنجاق موطلق تهلوکه‌‌‌سیزلیک و ساغلاملیق پرینسیپلرینه اویغون اولاراق محرم ماتمینی کئچیره‌جییک» دئدی.
دقیقلیگینی تکذیب ائتمک اوچون بیر چوخ دلیل اولان رسمی ایستاتیستیکایا گؤره، ایراندا هر گون اؤلنلرین 25 فایزی کرونا خسته‌لیگی سببیندن یاشاملارینی ایتیریلر. بونو آچیقلایان صحیه ناظری‌نین معاونی ایرج حریرچی، ایراندا گونده 1000نفردن چوخ اؤلوم حالی‌نین بئشده بیری‌نین کرونا سببیندن اولدوغونو سؤیله‌دی کی، بو دا چوخ اهميّتلی بیر رقمدیر.
صحیه ناظری‌نین معاونی قریپ واکسه‌نی‌نین یئرلی اورتیمی‌نین و ایراندا ایستیفاده‌سی‌نین بو ایلین پاییزینا قدر یئکونلاشاجاغینا اومید ائتدیکلرینی ده بیلدیردی. صحیه ناظرلیگی‌نین ساغلاملیق مرکزلری‌نین احاطه‌‌‌سی آلتیندا اولان حامیله قادینلار و ریسک آلتیندا اولان و اساس خسته‌لیگی اولان اینسانلار واکسه‌نی آلا بیلرلر.
بونونلا یاناشی، دکتر حریرچی، تلویزیونا وئردیگی موصاحیبه‌ده کرونا خسته‌لیگی، خسته‌خانایا یئر‌لشدیرمه و اؤلوم حاللاری‌نین آرتماسیندان جدی ناراحاتلیغینی ایفاده ائده‌رک، صحیه ناظرلیگی‌نین اؤلکه داخیلینده ماسکه‌لردان ایستیفاده‌نین 50فایز جیواریندا اولماسینی، لاکین خسته‌لیگی ایداره ائتمک اوچون اهالی‌نین 95 فایزنین ائودن چیخاندا و ائوه قاییداندا ماسکه تاخمالاری‌نین لازیم اولدوغونو سؤیله‌دی. دکتر حریرچی‌نین دئدیگینه گؤره، اؤلکه‌ده ساغلاملیق قایدالارینی رعایت ائتمه‌نین اورتالاماسی اوفیسلرده 70فایز، قبریستانلیقلاردا 80فایز، رستورانلاردا 77فایز، داوا‌خانالاردا 26فایز و مطبلرده تخمیناً 10فایزدیر.
مجلیسین تحصیل کمیسیونونون باشقانی، مجلیسین اؤیرنجیلرین یوکسک لیسانس سويه‌‌سینه قبولونون یالنیز آکادمیک قئیدلر یولو ایله آپاریلماسی اوچون بیر پلان حاضرلاماق قرارینا گلدیگینی بیلدیرسه ده، مجلیسین تحصیل و تدقیقات کمیسیونونون عضوو «مهرداد ویس‌کرمی»، ایسنا خبر آژانسینا وئردیگی آچیقلامادا، تحصیل کمیسیونوندا یو.سک لیسانس و دکترانین بیلیم‌یوردلارینا گیریش ایمتاهانلاری‌نین لغوی پلانی‌نین اولمادیغینی سؤیله‌دی.
بو واخت، اؤیرنجی سئچمه و ديرلندیرمه تشکیلاتیندا، ایسلامی مشورت مجلیسی‌نین موشاهیده‌چی عضوو اولان «علی کریمی»، بیلیم‌یوردلارینا گیریش ایمتاهانلاری‌نین کئچیریلمه‌مه‌سی ایله باغلی هر هانسی بیر قراردا کرونا ایله موباریزه اوزره قورولان قرارگاهی‌نین مسوولیت داشیدیغینی و مجلیسین قرار وئرمک اوچون هئچ بیر گیریشی اولمادیغینی سؤیله‌دی.
اعلان ائدیلمسه ده ان آزی ایکی هفته‌دیر کی قیرمیزی وضعيتده اولان تهراندا، تهلوکه‌‌‌سیزلیک پولیسی‌نین معاونی بربرلر و گؤزللیک سالونلاری، یاس و توی سالونلاری، چای‌خانالار، کافه‌لر، رستورانلار، اینجه‌صعنت مرکزلری و سو ایدمان مرکزلری، قاپالی اوزمه حوووزلاری و فیتنس کلوبلاری هفته‌نین سونونادک باغلاناجاغینی آچیقلادی.
بو واخت، تهرانداکی کرونا ایله موباریزه عملیاتلاری‌نین فرماندهی اولان «علیرضا زالی»، صحیه ناظرینه گؤندردیگی بیر مکتوبدا، کرونانین یاییلماسی‌نین قارشیسینی آلماق اوچون شهرده نقلياتین حرکتینی آزالتماق اوچون ایشچیلرین و تشکیلاتلارین و ایجرا اورقانلاری‌نین ایشچیلری‌نین 50فایزنی اوزاقدان چالیشمایا چاغیردی.
تهرانداکی قیرمیزی وضعیت سون درجه کریتیک گؤرونسه ده، والی «انوشیروان محسنی بندپی»، ایالت کرونا قرارگاهی‌نین قراری ایله محدودلاشدیریلان ایشیئرلری‌نین فعالیتی‌نین نظارتینه ایشاره ائده‌رک، حؤکومتین دیگر مسوول‌لاریندان دیندارلیقدا گئری قالماماق اوچون، اعلان ائدیلن ساغلاملیق پروتکل‌لارینا اویغون اولاراق محرم مراسیمی‌نین تهران ایالتینده کئچیریله‌جه‌یینی آچیقلادی.
کروناویروسون یاییلماسی باخیمیندان کریتیک بیر وضعیتده اولان مازانداراندا، یاییلما هله ده آرتیر. دونن گئجه کلینیک تشخیصی اساسیندا مازانداران و بابل طبّ علملری بیلیم‌یوردونون حمایه‌‌‌سی آلتینداکی خسته‌خانالارا 369 یئنی کرونا خسته‌سی قبول ائدیلدی و بو ایالتده قبول ائدیلن کرونا خسته‌لرین توپلام سایی 1921 نفره چاتدی.
بونونلا بیرلیکده مازانداران ایالتینه سیاحتلر داوام ائدیر. صحیه ناظری‌نین معاونی گلستان و مازاندارانداکی وضعیتدن ناراحاتلیغینی ایفاده ائتدی و سیاحتچیلردن مازاندارانا گئتمه‌مه‌لرینی ایسته‌دی. چونکی یولوخما اِحتیمالی یوکسکدیر و مازانداران طبّ علملری بیلیم‌یوردونون رئیسی ده بو گونه قدر مازاندارانین طبّ و صحیه چالیشانلاری‌نین 1000 نفردن چوخ عضوونون کرونا خسته‌لیگینه یولوخدوغونو سؤیله‌دی.
زنگان ایالتینده، زنجان طبّ علملری بیلیم‌یوردونون صحیه ایشلری اوزره معاونی «محمدرضا صائینی»، ایالتین بیر چوخ بؤلگه‌لری‌نین قیرمیزی وضعیتده اولدوغونو سؤیله‌یه‌رک، ایالتین آرتیق خسته‌لیگین زیروه‌سینده اولدوغونو سؤیله‌دی. بیلیم‌یوردوندان وئریلن معلوماتا گؤره، حاضیردا ایالتده 521 نفر کرونا خسته‌سی خسته‌خانایا یئر‌لشدیریلیب.
همدان ایالتینده، همدان طبّ علملری بیلیم‌یوردونون رئیسی «رشید حیدری‌‌مقدم»، بو ایالتده 2مین 817 نفرین کرونا ویروسونا یولوخدوغونو، عینی زاماندا 328 نفرین اؤلدویونو بیلدیردی و ایالتین همدان، نهاوند، تویسرکان، کبودراهنگ و ملایر ده داخیل اولماقلا 5 شهری‌نین ییغیناجاق اورتاملارینا گؤره قیرمیزی وضعیتده اولدوغونو بیلدیردی. آنجاق عینی زاماندا همدان والیسی محرم ماتم مراسیملری‌نین پروتکل‌لارا و میلی قرارگاهین اعلان ائتدیگی تعلیماتلارا اویغون کئچیریله‌جه‌یینی آچیقلادی.
رضوی خوراسان کرونا خسته‌لیگی باخیمیندان کریتیک وضعیتده و صحیه ناظری‌نین معاونینین سؤزلرینه گؤره، سون بیر آیدا خسته‌لرین سایی 300فایز آرتمیشدیر. رضوی خوراسان والیسی‌نین سیاسی و سوسیال تأمینات عوذره معاونی «حسن جعفری»، بیر سیرا ساغلیق چالیشانلاری‌نین کرونانین ایکینجی دالغاسیندا اؤلدویونو، بعضیلرینه یولوخدوغونو، قالانلاری‌نین چوخ چتین وضعیتده موعالیجه ائدیلدیگینی سؤیله‌دی.
لاکین عینی زاماندا مشهدین جوما ایمامی «احمد علم‌الهدی»، کرونا بؤحرانینی ایداره ائتمک اوچون حیاتا کئچیریلن سیاستلری تنقید ائده‌رک، توربه‌نین باغلانماسی، جوما نمازی‌نین باغلانماسی، مسجیدلرین، بازارلارین و ایلنجه مرکزلری‌نین باغلانماسی‌نین موعالیجه یولو اولمادیغینی سؤیله‌یه‌رک بونو دقتسیز ایداره‌ائتمه اولاراق آدلاندیردی.
دیگر طرفدن، ایرانین گونئیینده، بوشهر ایالتینده، بو ایالتین کرونا ایله موباریزه اوزره قرارگاهی‌نین کاتیبی «سعید کشمیری»نین وئردیگی معلوماتا گؤره، جوما گونو ایالتین خسته‌خانالاریندا شوبهه‌لی بیلینن 34 یئنی خسته خسته‌خانایا یئر‌لشدیریلدی و بو ایالتده کرونا خسته‌لرینین توپلام سایی 315 نفره چاتدی.
ایلام ایالتینده، دونن گئجه بو شهرده طبّ علملری بیلیم‌یوردونون رئیسی «محمد کریمیان»ین آچیقلاماسینا گؤره، 88 یئنی کرونا خسته‌لیگی آشکار ائدیلدی و ایالتده کرونا خسته‌لیگی اولانلارین سایی 5مین464 نفره چاتدی و کرونادان اؤلنلرین توپلام ساییسی ایسه 160 نفره چاتدی.
تخمیناً بیر هفته‌دیر کی، قیرمیزی وضعیتده اولان کرمان ایالتینده، کرمان طبّ علملری بیلیم‌یوردونون سؤزچوسو «مهدی شفیعی»، ایالتین خسته‌خانالاریندا 97 یئنی کرونا خسته‌سی‌نین خسته‌خانایا یئر‌لشدیریلمه‌سینه توخوناراق دئدی کی، عینی دؤورده رسمی ایستاتیستیکایا گؤره، همین ایالتده 10 نفر کرونا خسته‌سی یاشامینی ایتیردی.
هرمزگان طبّ علملری بیلیم‌یوردونون رئیسی، «حسین فرشیدی»، هرمزگانین 8 شهری‌نین قیرمیزی وضعیتده اولدوغونا توخوناراق، کرونانین هرمزگاندا کئچن هفته 61 نفرین اؤلدویونه سبب اولدوغونو و ایالتده اؤلنلرین سایی‌نین 496 نفره چاتدیغینی سؤیله‌دی. دکتر فرشیدی‌نین سؤزلرینه گؤره، ایالتده کرونا خسته‌لیگیندن خسته‌خانایا یئر‌لشدیریلنلرین توپلام ساییسینی 418 نفر اولدوغونو و اونلاردان 90 نفری‌نین اؤزل باخیم شؤبه‌سینده و بونلاردان 33 نفری‌نین وضعیتی‌نین آغیر اولدوغونو دئدی.
رسمی اولاراق اعلان ائدیلمسه ده بیر نئچه گوندور قیرمیزی وضعیتده اولان مرکزی ایالتینده ، دونن گئجه بو ایالتده 202 یئنی کرونا خسته‌سی‌نین آشکار ائدیلمه‌سینه توخونان اراک طبّ علملری بیلیم‌یوردونون رئیسی «محمد جمالیان»، دئدی؛ بو گونه قدر ایالتده 6 مین 38 نفر کرونا خسته‌سی تثبیت ائدیلیب و بونلاردان 255 نفری یاشامینی ایتیریب.
صحیه ناظرلیگی‌نین سؤزچوسو سون ایکی گونلوک توپلانتیسیندا کهگیلویه و بویراحمد و سیستانوبلوچیستان، ایالتلرینده کرونانین یارانماسینا توخوناراق بو ایالتلرده خسته‌خانایا یئر‌لشدیرمه پروسئسی‌نین هله ده آرتدیغینی و مثلا کهگیلویه و بویراحمدده سون ایکی آیدا اورتالاما گونده‌لیک خسته‌لرین سایی‌نین 4 قات و حتی گچساراندا گونده‌لیک خسته‌خانایا یئر‌لشدیرمه نیسبتینین 10 قات آرتدیغینی سؤیله‌دی. خانیم سادات سالاری‌نین سؤزلرینه گؤره، هم پارسیان، هم ده کیش آداسیندا خسته‌خانایا یئر‌لشدیرمه و یولوخما ساییلاری‌نین آرتماسی ناراحات ائدیجیدیر.
صحیه ناظرلیگی‌نین سؤزچوسو «سیما سادات سالاری»، وئردیگی راپوردا، لرستان، البرز، دوغو آذربایجان ، باتی آذربایجان، ایلام، بوشهر، رضوی خوراسان، خوزستان، زنگان، گلستان، مازاندران، کرمان و فارس ایالتلرینین قیرمیزی وضعیتده و تهران، اصفهان، بوشهر، هرمزگان، قزوین، مرکزی، قوزئی خوراسان، گونئی خوراسان، سمنان، اردبیل، سیستانوبلوچیستان، همدان، اردبیل و کهگیلویه‌وبویراحمد ایالتلرینین ده خبردارلیق وضعیتینده اولدوغونو بیلدیردی.
سون گونلرده وورغولادیغیمیز کیمی صحیه ناظرلیگی‌نین و بیلیم‌یوردلاری‌نین یایدیغی معلومات و استانداردلارا اساساً، تهران، گونئی خوراسان، سیستان و بلوچیستان و مرکزی ایالتلری خبردارلیق دئییل بلکه قیرمیزی وضعیتده و کرمانشاه، ، کوردستان، قوم و یزد ایالتلری ده خبردارلیق وضعیتده‌دیر.
صحیه ناظرلیگی‌نین سؤزچوسونون 4 مرداد دا آچیقلادیغی ایستاتیستیکا، بو مدتده 2316 نفره کرونا تشخیصی قویولدوغونو، اونلاردان 1004 نفری‌نین خسته‌خانایا یئر‌لشدیریلدیگینی و توپلام اولاراق دا 288 مین 839 نفرین یولوخدوغونو سؤیله‌دی. عینی زاماندا دیگر 195 خسته اؤلدو و ایراندا کرونادان قایناقلانان اؤلوم ساییسینین توپلامی 15 مین 484 نفره چاتدی.
