شروین حاجی‌پور حبس جزاسینی چکمه‌ک اوچون چاغیریلیب
داها اؤنجه ۳ ایل ۸ آی آی مدتینه آزادلیقدان محروم ائدیلن “قادین، حیات، آزادلیق” اعتراض دالغاسی‌نین طرفداری “شروین حاجی‌پور”ون حؤکمو تئمییز محکمه‌سینده تصدیقله‌نیب و او، حؤکمون ایجراسی اوچون حبس‌خانایا چاغیریلیب.
شروین حاجی‌پور بو خبری دونن ۹ مرداددا اینستاگرام صفحه‌‌‌سینده یاییملادیغی ویدئودا آچیقلاییب و بیلدیریب کی، یاخین گونلرده حبس‌خانایا اؤزونو تقدیم ائتمه‌لی اولدوغو باره‌ده اونا بیلگی وئریلیب.
او، بو حؤکمون وئریلمه‌سینه سببین “برای” ماهنیسی‌نین اوخونماسی اولدوغونو بیلدیریر و دئییر کی، تئمییز محکمه‌‌سی اونون اؤلکه‌دن چیخیشینا قویولان قاداغانی آرادان قالدیریب. بو حؤکمو تنقید ائدن بو اعتراضچی موغنی دئییر کی، بو حؤکمون اونا وئریلمه‌سینه اعتراضینی نئجه بیلدیرمه‌لی اولدوغونو بیلمیر. او بو ویدئونون بیر حیصه‌‌‌سینده دئییر کی،“ماهنیدان داها دینج و سیویل شکیلده اعتراض ائتمک اولارمی؟
شروین حاجی‌پور سؤزونه داوام ائدیر: “منیم اتهامیم اینسانلاری اؤلدورمه‌یه و دؤیوشمه‌یه تحریک ائتمکدیر، بو شعرین هانسی بندی سیزی کیمیسه اؤلدورمه‌یه تحریک ائدیر؟”
داها اؤنجه ۱۱ اسفند گونو بو موغنی اینستاگرام حسابیندا اتهاملارا گؤره ۳ ایل ۸ آی مدتینه آزادلیقدان محروم ائدیلدیگینی آچیقلامیشدی.
۱۴۰۱-جی ایلین عومومی اعتراضلارین اورتاسیندا ایشیق اوزو گؤرن “برای” ماهنیسی گئنیش رغبتله قارشیلانیب. بو ماهنی یاییملاندیقدان سونرا شروین حاجی‌پور حبس ائدیلیب و بیر مدت حبسده قالیب و بو ماهنی‌نین ویدئوسو اونون اینستاگرام صفحه‌‌‌سیندن سیلینیب.
لاکین “برای” ماهنیسی “گرمی” آکادمیسی‌نین سایتی طرفیندن ایران حؤکومتینه قارشی اعتراضچیلارین قئیری-رسمی مارشی کیمی تقدیم ائدیلمیش و ۱۴۰۱-جی ایلده ۶۵-جی گرمی اؤدولونون مونصیفلر هئیتی بو ماهنییا “سوسیال ديیشیکلیک اوچون ماهنی” اؤدولونو وئرمیشدی. تایم ژورنالی آیریجا شروین حاجی‌پورو ۲۰۲۳-جو ایلین ان نوفوذلو ۱۰۰ شخصیتیندن بیری کیمی تقدیم ائدیب.
بو عدالتسیز حؤکمون وئریلمه‌سی او شرایطده وئریلیب کی، مسعود پزشکیانین آندیچمه مراسیمی پونن مجلیسده کئچیریلیب. بو مراسیمده پزشکیان اؤونو ایران وطنداشلارینی حوقوقلاری‌نین مودافیه‌چیسی اعلان ائدیب.
Iranwire