سها رضانژاددان سونرا باشقا بیر گنج کردکوی مئشه‌سینده ایتدی
وئریلن بیلگیلر، گولیستان ایالتینده‌کی کردکویون توریزم داغلاریندا بیر گنجین ایتکین دوشدویونو گؤستریر.
ایتکین دوشن شخصین، کیملیگی ۳۶ یاشلی معین شریفی اعلان ائدیلیب کی کئچن ۱۱ گونده عرضینده بو بؤلگه‌ده ایتیب و اونو تاپماق چابالاری ایندییه قدر اوغورسوز اولوب.
کردکوی قیزیل آی جمعيتی‌نین رییسی حسن باقری ده “بو گونه قدر آختاریش عملیاتیندان ۱۱ گون سونرا بو گنجین هئچ بیر ایزینه راست گلینمه‌دیگینی” سؤیله‌دی.
باقری علاوه ائدیب، “جوما گونو سحر، ۷۰ نفردن چوخ داغجی و شهر اهالیسی ایله آختاریش عملیاتینی باشلادیق، لاکین یئنه ده بیر سونوج آلمادیق”.
اؤنوموزده‌کی گونلرده اوردونون بو گنج آدامین بیر ایزینی تاپماق اوچون آختاریش قروپونا قاتیلاجاغی بیلدیریلیر.
ایکی آی اؤنجه ۲۷ یاشلی سها رضانژاد عینی بؤلگه‌ده ایتکین دوشدو و بیر آی سونرا جانسیز بدنی نهایت چتین بیر اراضیده تاپیلدی.
بو قیزین یوخا چیخماسی اوزون مدتدیر سوسیال مئدیادا دئییلن قونودور و اؤلومونون سببی هله بللی ائدیلمه‌ییب.
