دونیا ساغلیق تشکیلاتی اوچ ایلدیر ایرانین ساغلیق ایستاتیستیکاسیندان خبرسیزدیر
ساغلیق ناظرلیگی‌نین اولوسلارآراسی ایلیشگیلر عوذره کئچمیش مودیری ایرانین ساغلیق بیلگیلری‌نین ۲۰۲۱-جی ایلین اورتالاریندان دونیا ساغلیق تشکیلاتینا (WHO) گؤندریلمه‌دیگینی آچیقلاییب.
ساغلیق ناظرلیگی‌نین اولوسلارآراسی ایلیشگیلر عوذره کئچمیش مودیری دوکتور محسن اسدی‌لاری سلامت نیوز خبر آژانسینا وئردیگی موصاحیبه‌ده اوچ ایل ایچینده ایران‌دا ساغلاملیغین دورومو ایله باغلی هئچ بیر ایستاتیستیک بیلگینی دونیا تشکیلاتینا گؤندریلمه‌دیگینی آچیقلاییب و دئییب کی، بو ایرانین قانونی وظیفه‌‌‌لری و اولوسلارآراسی عهده‌‌لیکلری ایله و بو تشکیلاتلا ساغلیق ساحه‌‌‌سینده امکداشلیغی ایله ضديت تشکیل ائدیر.
ساغلیق ناظرلیگی‌نین بو کئچمیش یئتکیلیسی ایستاتیستیک بیلگیلرین گؤندریلمه‌مه‌سی‌نین سببلری‌نین بلیرسیز اولدوغونو و یا گوونلیک سببی ایله اولدوغونو بیلدیریب و دئییب کی، گؤره‌ویندن گئتدیکدن سونرا بو امکداشلیق دایاندیریلیب و سون اوچ ایلده ایرانین ساغلیق بیلگیلری آچیقلانماییب وWHO تقدیم ائدیلمیشدیر.
او قئید ائدیب کی، بو مدت ایچینده ایرانین ساغلیق بیلگیلری ایله باغلی دوروم “آنورمال” اولوب.
آیریجا، سلامت نیوز خبر آژانسی‌نین خبرینه گؤره، واشینقتون بیلیم‌یوردونون ساغلاملیق اؤلچمه و قیمتلندیرمه انستیتوسونون ایرانلی پروفسورو دوکتور محسن نقوی ده بو سؤزلری تصدیقله‌ییب و اعتراف ائدیب کی، ایران یئتکیلیلری ۲۰۱۶-جی ایلدن ساغلیق ایله باغلی یئنی بیلگیلر ساغلیق دونیا تشکیلاتینا تقدیم ائتمه‌ییبلر.
او بیلدیریب کی، ایران ساغلیق ناظرلیگی‌نین بو بیلگیلری آمریکا کیمی CIA جاسوس تشکیلاتلاری طرفیندن ایستیفاده‌سی ایله باغلی گوونلیک ناراحاتلیغی اساسسیزدیر، چونکی بو بیلگیلر یالنیز علمی آراشدیرمالار و اهالی‌نین ساغلاملیق دورومونو قیمتلندیرمک اوچون ایستیفاده اولونور.
