دوشرگه رمانیندان کیچیک پارچا…
دینمز دانیشماز نیمکت اوسته أیلشیب، انجیلی دیزیم اوسته قویورام. یاشلی کیشی دیزیم اوسته‌کی کیتابا زیلله‌نیر. ایکیمیز ده سلامیمیزی اودوروق. اونون باخیشیندان هئچ بیر شئی سئچه بیلیمرم. دییه‌سن دونن هیجانلا سامان مئیدانی اوشاغییام دئین آدام بو دئییلمیش. اونون خبری یوخدور دوشرگه‌یه گئدیرکن تانیمادیغیم بیر دویغو منی تگل ساحیلینه ساری گتیریب. او ایسه دیزیم اوسته‌کی انجیل کیتابینا اشاره ائدیب دئییر: «نئجه بیر تجربه‌دی؟»
سوسوب، دنیزین اوجقارینا زیلله‌نیرم. اونون سوالی ذهنیمه تاققا ویریب، یئنه هؤوشنه‌یه دوشورم. بیردن بیره کتابین آدینی أللریم آتدا گیزله‌دیرم. مسلمان بیر عایله‌ده دوغولوب، بویا باشا چاتیب، عایله و یاشادیغیم تورپاغین کولتورو ایلیک سومویومه کئچیب. بو یاشا چاتینجا یاشادیغیم تجربه‌لرین هئچ بیرینده خریستیانلیغین یئری یوخ ایدی. بوندان بئله مصلحت اوزویله سئچدیییم بو تجربه‌نی نئجه یاشامالییام!
بیر آن اؤزومو دنیزین تلاطومونده اوزه‌ین قالمیش بیر زیبیل کیمی، هئچ کیمی حیس ائدیرم. آمما زیبیل هئچ آنلامیندا دئییل، زیبیل بیر زامان کارا گلن بیر شئی ایمیش. بلکه ده زیبیل هئچ‌دن یاخچی‌دیر.
« سیزین نظریزه مصلحت اوزوینن یالان دیین‌لر اؤز وجدانلارینا دا یالان دییه بیلرلر؟»
او ایسه انجیلی أللریمین آلتیندان چکیب واراقلاییر.
«بو کیتابی تربیزدن آلیبسان؟»
«کیلسه راهیبینین هدیه‌سی‌دیر.»
«یالانین مشتریسی اولماسا آدام یالان دانیشماغین تتینمه‌سینی بوینونا آلماز. بولوسن عرضه –تقاضا ندی؟ خبرین وار سنه وئریلن بو کیتاب کاپیتالیسمین عرضه تقاضا پروسه‌سینین بیر پارچاسیدیر؟»
تعجوب ایله اونا باخیرام. او ایسه آرتیریر: «کتابی سنه وئرنده اؤزوندن سوروشدون فارسجا انجیل کیتابی آلمان دیللی بیر راهیبین ألینده نه قئییریر؟»
«ایرانلی مهاجیرلر آراسیندا خریستیانلیغا کئچنلرین ساییسی چوخ اولدوغونا گؤره‌دی یقین. بورا گلمه‌میشدن، تبریزده بو کیتابی اوخویوب، دین ده‌ییشدیرمک قرارینا گلدییمده بو ایشین چوخ ساده اولدوغونو دوشونموشدوم. آمما ایندی اؤز اؤزومله ساواشدایام. اؤزومو بیر فیریلداقچی کیمی حیس ائدیرم.»
«آدلارینان اویناماغی خوشلامارام. سؤزون جیرگی بودو با قیزیم: راهیب‌لر خریستیانلیغی تره‌زی‌نین بیر کفه‌سینده عرضه ائدیرلر، سنین کیمی مهاجیرلر ده اونو تره‌زی‌نین او بیری کفه‌سینده آلیرسیز. گاهدان بو پروسه‌ده بیر طرف ضررلی چیخیر گاهدان دا هر ایکی طرف؛ چوخ آز گؤرونور کی تره‌زی‌نین هر ایکی کفه‌سی برابر بیر وضعیتده دایانسین.»
ایدی‌یه کیمی دین ده‌ییشدیرمک پروسه‌سینه اونون دئدییی آچیدان باخمامیشدیم.
«بئله واختلار مسئولیت فقط تقاضا ائده‌نین بوینونا دوشمور، عرضه ائده‌نین ده بوینوندا مسئولیت وار. سن هدفیوه چاتماغیوا گؤره خریستیانلیغا کئچمه‌یی تقاضا ائتسن ده، او راهیب کیمی‌لری ده اؤزل بیر هدف ایله خریستیانلیغی سنه عرضه ائدیرلر. بو عرضه تقاضانین آرخاسیندا انکار آدلی اورتاق بیر شئی وار، هر ایکی طرف ده واقعی هدف‌لرینی انکار ائدیب بو پروسه‌نین دوامچیسی اولورلار.»
یاشلی کیشی دین ده‌ییشدیرمک پروسه‌سینی ساده دیلده خیردالادیقجا منه ائله گلیر کی فیریلداقچیلیق بیر مئیوه کیمی ایکی‌یه بؤلونوب، یاریسی منیم أته‌ییمده او بیری یاریسی ایسه راهیبین خرقه‌سینده‌دیر.
Ruqeyye Kebiri
