خامنه‌ای‌نین سیستان و بلوچیستان ایالتینده‌کی کئچمیش نوماینده‌‌سی اؤلدورولوب
ایرانین بیر سیرا یئرلی مئدیاسی چارشنبه گونو ۶ اردیبهشت ۱۴۰۲-ده علی خامنه‌ای‌نین سیستان و بلوچیستان ایالتینده‌کی کئچمیش نوماینده‌‌سی و رهبرلیک اوزمانلار مجلیسی‌نین عضوو عباس علی سلیمانی‌نین بابلسرده سلاح ایله هدف آلیناراق اؤلدورولدویونو بیلدیریب.
مازانداران ایالتی والیلیگی‌نین سیاسی معاونی بو خبرین آیرینتیلارینا توخونمادان بیلدیریب کی، رهبرلیک اوزمانلار مجلیسی‌نین بو کئچمیش عضوونه هوجوم ائدن شخص گوونلیک گوجلری‌نین چابالاری ایله حبس ائدیلیب و بونونلا باغلی آرتیق خبرلر ده تئزلیکله درج اولوناجاق.
حوزه نیوز سایتی‌نین خبرینه گؤره، خامنه‌ای‌نین سیستان و بلوچیستانداکی کئچمیش نوماینده‌‌سی بابلسرین میلی بانکیندا “بانک موحافیظه‌‌‌چیسی‌نین سلاحینی آلان” شخص طرفیندن وورولوب.
عباس علی سلیمانی ۱۳۸۰-۱۳۹۷-جی ایللر آراسیندا خامنه‌ای‌نین سیستان و بلوچیستانداکی نوماینده‌‌سی اولوب و بوندان سونرا، ۱۳۹۹-جو ایل ۲۵ مرداددان ۹ فروردینه کیمی کاشاندا رهبرین نوماینده‌‌سی و جوما ایمامی اولوب.
یئرلی قایناقلارین وئردیگی بیلگیلره گؤره، سلیمانی ۱۳۸۸، ۱۳۹۲ و ۱۳۹۶-جی ایللرده زاهیدان بیلیم‌یوردونون اؤیرنجیلری اعتراضلاری‌نین یاتیریلماسیندا، ائله‌جه ده خالق اعتراضلاری‌نین یاتیریلماسیندا، حبسلرین، پرونده‌لرین آچیلماسیندا و اعتراضچیلارا ایشگنجه وئریلمه‌سینده ائتکیلی رول اویناییب.
