خالخالدا چئورهنین قورونماسی اوچون اعتراض آکسیاسی کئچیریلیب
۲۶ تیر ۱۴۰۳-جو ایل چارشنبه آخشامی اردبیل ایالتینین خالخال شهرینین خمس کندینین ساکینلری بؤلگهدهکی قوم معدنلری و قوم یویان فابریکلرین داغیدیجی فعالیتینه اینسان زنجیرینی یاراداراق و پلاکاتلار نومایش ائتدیرهرک اعتراض آکسیاسی کئچیریبلر.
خمس کندینین ساکینلری بو معدن و فابریکلرینی ایستیثمار قایدالارینی پوزدوقلارینی، بؤلگهدهکی چئورهنین محو ائدیلمهسی و هاوا چرکلیلیگینین آرتماسینا سبب اولدوقلارینی دئییبلر.
اعتراضچیلار یئتکیلیلرین کندین اکولوژی دورومونون ديیشمهسینه، توریزم ایمکانلارینین محو اولماسینا سبب اولان معدنلره ایجازه وئرن یئتکیلیلرین موحاکیمه اولونمالارینی ایستهییبلر.
ناراضیلارین قالدیردیقلاری پلاکاتلاردا معدن و فابریکلرین بؤلگهیه ووردوقلاری زیانلار قئید ائدیلیب، و اونلارین فعالیتینین قارشیسینین آلینماسی ایستهنیلیب.
بو پلاکاتلاردا یازیلیب کی، “گلین ال-اله وئریب و بیرلیکده آتا-بابالاریمیزین بیزه قویدوغو ایرثی قورویوب و گلهجک نسیله تحویل وئرک”.
قئید ائدک کی، خمس کندی خالخالین ان بؤیوک کندلریندندیر و طبیعی گؤزللیگی و باشقا ایمکانلارینا گؤره بؤلگهنین توریزم مکانلاریندان بیری ساییلیر.
بوندان اؤنجه ده اوخشار پروبلئمله باغلی دفعهلرله اعتراض آکسییالاری کئچیریلسه ده بو گونه کیمی مسئلهنین حلی ایله باغلی آددیم آتیلماییب.
Iranwire
