تبریزین عومومی و اینقیلاب محکمه‌‌سی ۱۳ تورک مدنی فعالی دیندیرمه‌یه چاغیریب
تبریزین عومومی و اینقیلاب محکمه‌‌سی‌نین ۱۵-جی دیندیرمه شؤبه‌سی ۱۳ تورک مدنی فعالی سون مودافیه‌لرینی ائتمک چاغیریب.
بو فعاللار اؤتن ایل حبس ائدیلیب و اطلاعات ناظرلیگی‌نین تبریزده‌کی تک‌آداملیق هوجره‌سینده فیزیکی و روحی ایشگنجه‌لر آلتیندا ۱۰۰ گون دیندیریلیب.
ایندی ایسه بیلدیریشه اساساً، بو ۱۳ آذربایجانلی تورک فعال تبریز عومومی و اینقیلاب محکمه‌‌سی‌نین ۱۵-جی شؤبه‌سی طرفیندن “ایسلام جمهورییتینه قارشی چیخماق نيتی ایله قئیری-قانونی دموکرات قروپا عضو اولماق” و آیریجا “داخیلی و خاریجی گوونلیگه قارشی جینایت تؤرتمک اوچون توپلاشماق و ال بیر اولاق” اتهاملاری ایله سون ساوونمالارینی یاپماق اوچون چاغیریلیب.
آلینان خبره گؤره، «آراز ابراهیم نژاد، داود شیری، مهرداد قادری، یوروش مهر علی بیگلو و حامد یگانه پور» مودافیه اوچون ایستینطاقا گئدیب و «سیدمحمد رضا موحد و امیر حسین آقایی» ایسه چارشنبه و جومه آخشامی ۲۶ و ۲۷ دی گونو اوچون دیندیریلمه‌یه چاغیریلیبلار و «علی بابایی، جواد سودبر، مرتضی نور محمدی، حسین آزادی، ناصر رزمجو و ابراهیم عوض زاده» ده سون ساوونمالارینی وئرمک اوچون ۱۵-جی شؤبه‌یه گئده‌جکلر.
