بهایی وطنداش حوریه محسنی ۴ ایل حبسه محکوم ائدیلیب

مشهد اینقیلاب محکمه‌‌سی‌‌نین بیرینجی شؤبه‌سی حاکم منصوری‌نین باشقانلیغی ایله بهایی وطنداش حوریه محسنی‌نی ۴ ایل حبسه محکوم ائدیب.

چیخاریلان حؤکمه اساساً، حوریه محسنی اؤلکه‌نین گوونلیگینی پوزماق مقصدی ایله بهاییلیگی تبلیغ ائتمک مقصدی ایله اجتماعی آکسییا و سوسیال اینکیشاف قروپونا عضو اولماق اتهامی ایله ۳ ایل مدتینه آزادلیقدان محروم ائدیلیب. ایران ایسلام جمهورییتینه قارشی بهایی قروپلاشماسی‌نین خئیرینه تبلیغات آپارماق اتهامی ایله بیر ایل و توپلام اولاراق دا ۴ ایل حبسه محکوم ائدیلیب.

قئید ائدک کی، محکمه‌‌ حاکمی تقصیرلندیریلن شخصین وکیلی‌نین وکالتینی قبول ائتمه‌ییب و محکمه‌‌ ایجلاسی تقصیرلندیریلن شخصین و وکیلین ایشتیراکی اولمادان کئچیریلیب. خانیم محسنی ساوونما لاییحه‌‌سینی محکمه‌‌یه گؤندریب.

محکمه‌‌ حؤکمون سببی کیمی حوریه محسنی‌نین مشهد اطرافینداکی کندلردن بیرینده کؤنوللو اولاراق حیاتا کئچیردیگی خیريه‌‌چیلیک فعالیتینی گؤستریب. خانیم محسنی بیر نئچه آیدیر کی، مشهد اطرافینداکی محروم کندلردن بیرینده بیر نئچه اوشاغا ایراندا نشر اولونان کیتابلاردان اوجومله‌دن ریاضیات و دیل اؤیره‌دیر. کند جاماعتی‌نین و اوشاقلارین هئچ بیری‌نین اونون دینی اینانجیندان خبری یوخ ایدی.