بلوچ اؤیرنجی زاهدانداکی اینقیلاب کئشیکچیلری تجرید‌خاناسیندا ایشگنجه آلتیندا اؤلدورولوب
حال‌وش، ۱۹ یاشلی بلوچ اؤیرنجی سپهر شیرانی‌نین زاهدانداکی اینقیلاب کئشیکچیلری تجرید‌خاناسیندا حبس اولوندوقدان اوچ گون سونرا اؤلدویونو بیلدیردی. بلوچ فعاللاری‌نین کامپانییاسی اونون اؤلومونون سببی‌نین ایشگنجه اولدوغونو بیلدیریب. شیرانی سانال اورتامداکی فعالیتینه گؤره چارشنبه آخشامی ۱۰ بهمن گونو زاهیداندا گوونلیک گوجلری طرفیندن حبس ائدیلیب.
سیستان و بلوچیستان ایالتی‌نین خبرلرینی یایان حال‌وش اؤز قایناقلارینا ایستناداً یازیب کی، جوما آخشامی ۱۲ بهمن گونو اینقیلاب کئشیکچیلری مامورلاری جناب شیرانی‌نین عائله‌‌‌سینه زنگ ائده‌رک اونون حیاتینی ایتیردیگینی اعلان ائدیبلر.
بو راپوردا دئییلیر: ایسلام جمهورییتی‌نین گوونلیک گوجلری و محکمه سیستمی هله ده اونون عائله‌‌‌سینه ایشگنجه‌لره معروض قالدیغی گومان ائدیلن سپهرین نئجه اؤلدورولدویو ایله باغلی جاواب وئرمه‌ییب.
بو باغلامدا بلوچ فعاللاری کامپانییاسی سپهر شیرانی‌نین حبسی زامانی اطلاعات ایداره‌سی‌نین قوه‌لری طرفیندن ایشگنجه‌لره معروض قالدیغینی، سونوجدا حیاتینی ایتیردیگینی بیلدیردی.
عینی زاماندا رصد بلوچستان تلگرام کانالی بو باره‌ده یازیب: سپهرین یاخینلاری‌نین وئردیگی بیلگیلره اساسلاناراق، اونون اینتیهاری ایله باغلی خبرین تامامیله یالاندیر اولدوغونو وورغولاییریق.
باشقا طرفدن، سیستان و بلوچیستانین عومومی و اینقیلاب ساوجیسی مهدی شمس آبادی بو خبرلرله باغلی عصر هامون سایتینا دئییب: شیرانی هئچ بیر گوونلیک قورومو طرفیندن حبس ائدیلمه‌ییب و اونون اؤلوم سببی اینتیهار اولاراق اعلان ائدیلیب.
۱۹ یاشلی علی اوغلو سپهر شیرانی سیستان و بلوچیستان ایالتی‌نین زاهدان شهری‌نین ساکینی، فنوج شهری اصیللی ایدی.
