اینقیلاب کئشیکچیلری اعتیراضچیلاری قطعیتله قارشیلیق وئرمک ایله هده له ییب
دونن ۱۴ آذر ۱۴۰۱-ده اینقیلاب کئشیکچیلری اعتراضچیلاری ایسلام جمهورییتی‌نین گوونلیک، اطلاعات، پولیس و بسیج قوه‌لری‌نین قطعیتله قارشیلیق وئره‌جیی ایله هده‌له‌ین بیر آچیقلاما یاییب.
بو آچیقلامانین باشقا بیر حیصه‌‌‌سینده اینقیلاب کئشیکچیلری تهدید ائدیب کی، بو قوه‌لر اعتراضچیلارلا موناسیبتده گئجیکمه‌یه‌جک و ساکیتلشمه‌یه‌جک.
اینقیلاب کئشیکچیلری دوننکی آچیقلامانی “موساد ایله امکداشلیقدا” اتهام اولونان دؤرد نفرین اعدامینا گؤره عدليه سیستمینی “اؤومک” اوچون یاییب. بو حربی قوه آیریجا اعتراضلارلا باغلی تقصیرلندیریلن شخصلرین پرونده‌لری‌نین قطعی و تئز آراشدیریلماسی‌نین داوام ائتدیریلمه‌سینی ایسته‌ییب.
اینقیلاب کئشیکچیلری بو آچیقلامانین باشقا بیر حیصه‌‌‌سینده ادعا ائتدی: اؤلکه‌نین اعتراضچیلاری ایسلام جمهورییتی‌نین گوونلیک، اطلاعات، پولیس و بسیج قوه‌لری گوونلیک و توپلومسال آسایش اوچون تهدیدلره قارشی تمکینلی و عاغیللی شکیلده موباریزه آپاراراق، آلدادیلانلار دا سیرالارینی آییراراق، ایغتیشاشچیلار، سلاحلی قولدورلار و موزدلو تئررورچولارلا قطعی و گوجلو موباریزه آپاراجاقلار.
بازار گونو، ۱۳ آذر ۱۴۰۱-جی ایل، ایران خالقی‌نین عومومی قیامی‌نین حبس اولونان اعتراضچیلارینا آغیر جزالار وئریلمه‌سی ایله باغلی خبرلر هر گون مئدیادا درج اولونارکن، میزان خبر آژانسی اسرائیلله امکداشلیق اتهامی ایله حبسده اولان ۴ وطنداش اوچون اعدام حؤکمونون ایجراسینی اعلان ائتدی.
«حسین اردوخانزاده»، «شاهین ایمانی محمودآباد»، «میلاد اشرفی آتباتان» و «منوچهر شهبندی بجندی»، آدلارینداکی بو دؤرد وطنداش بو ایلین خرداد آییندا اسرائیلله اطلاعاتی امکداشلیق و قاچیریلما ماده‌‌سی ایله حبس ائدیلیب و اعدام جزاسینا محکوم ائدیلمیشدیلر.
بو، اینقیلاب کئشیکچیلری‌نین اعتراضچیلاری ایلک دفعه هده‌له‌مه‌سی دئییل.
#عومومی_اعتراضلار #اعدام
