ایسماییل جمیلی ;قوینون آچ گولشن کیمی…

قوینون آچ گولشن کیمی بویلانسین الوان گول چیچک
قویما سیخسین جانینی دونیا قارانلیق قبر تک
خوش گؤرویله سو چیله صبریله یانقین اودلارا
بوشلوق ایچره فیرلانان دونیانی توتما چوخدا برک
سیل دورولسون گؤزلرین کیندن آرینسین جان ائوی
اؤزگور اولسان اؤزلویونده دینجه لر یورغون اورک
سئوگی نیسانیله سوندور سینه ده حرصین اودون
آجلیغی باسدیرماغا بسدیر یاوان بیر ال چؤرک
سوسله مه ایمان ائوین اویدورمالارلا بیلمه دن
عقلینین مشّا طه سی قوی علم ایله وئرسین بزک
بیز گؤزه للیک وورغونو دوزگون سئور اؤزگورلریک
دؤنمه ریک سئودا یولوندان قوپسادا یئرسیز کولک
قورخودوب قولدور قارانلیق قپ مالین قوللانسادا
دان آچیلدیقدا ائدر لر یاخشینی پیسدن الک
جانه گلدیک غوربت وصلینده جانا قیل کرم
ظولمت زولفون کنار ائت بیزده بیر بیر گون گؤرک