ایرانین ائو صاحبلیگینی لغو ائتمک اوچون سوریه فوتبول فدراسیونو رسمی ایستکده بولوندو
عرب مئدیاسی سوریه فوتبول فدراسیونونون ایرانین دونیا کوپاسی‌نین سئچمه مرحله‌‌‌سینه ائو صاحبلیگی ائتمه‌سینه قارشی رسمی اعتراضینی بیلدیردی.
عرب دیللی الکوره سایتی بو گون سوریه فوتبول فدراسیونونون باش کاتیبی ابراهیم ابا زیده ایستناداً سوریه‌نین آسیا فوتبول کنفدراسیونونا اعتراض مکتوبو یازدیغینی بیلدیردی.
ابراهیم ابا زید الکوریه دئییب کی، ایران هله ده آزادی استادیومونو وار (ویدئو حاکم یاردیمجیسی) تکنولوژیسی ایله تجهیز ائتمه‌ییب. سوریه فوتبول فدراسیونونون باش کاتیبی ایرانداکی کرونا سالقینینا دا توخوناراق ایرانا گئتمه‌یین سوریه‌لی اویونچولار و مشقچیلر اوچون تهلوکه‌‌‌لی اولدوغونو دئییب.
او دئییب: “ایراندا کروناویروسا یولوخانلارین سایی هر گون سرعتله آرتیر. اویونون طرفسیز مئیداندا کئچیریلمه‌سینی ایسته‌ییریک و رسمی اولاراق ایرانین ائو صاحبلیگینه اعتراض ائتدیک.”
سوریه میلی کومانداسی ۱۱ شهریورده (گلن هفته جوما آخشامی) آزادی استادیوموندا دونیا کوپاسی سئچمه مرحله‌‌‌سینده ایلک ماچیندا ایرانلا قارشیلاشاجاق.
دونیا کوپاسی سئچمه مرحله‌‌‌سینده آسیادا کئچیریله‌جک پوشکاتما مراسیمینده بعضی سانال اورتام قوللانیجیلاری ایرانی آ قروپوندا “خرجلری عهده‌‌سینه آلان” آدلاندیردیلار. ایران قروپوندا گونئی کوره و اماراتدان باشقا سوریه، عراق و لبنان کوماندالاری دا وار. ایسلام جمهورییتی‌نین سون ایللرده حربی ایشتیراکی اولدوغو اؤلکه‌لر.
بو گونه قدر سوریه استثنا اولماقلا، ایران میلی فوتبول کومانداسی ایله عینی قروپدا اولان کوماندالاردان هئچ بیری ایرانین ائو صاحبلیگینه اعتراض ائتمه‌ییب.
iranwire
