ایراندا شدتله داوام ائدن اعداملار اینسان حوقوقلاری فعاللارینی قایغیلاندیریب
سون هفته‌لر و آیلار ایچینده ایراندا اعدام حؤکمونون ایجراسی‌نین گؤرونمه‌میش بیر شدتله داوامی اینسان حوقوقلاری تشکیلاتلاری و مدنی فعالاری قایغیلاندیریر.
بونونلا باغلی ایران اینسان حاقلاری تشکیلاتی کئچن هفته یایدیغی بیر راپوردا بو ایلین ایلک ۷ آییندا ایراندا ان آزی ۳۰۰ نفرین اعدام ائدیلدیگینی آچیقلاییب. بو راپورا گؤره، سون ۷ آیدا اعدام ائدیلنلر آراسیندا ۴۲ بلوج وطنداش، ۲۰ کورد وطنداش، ۲۰ افقانیستان وطنداشی، بیر عراق وطنداشی و ۱۵ قادین وار.
بو راپوردا “ابراهیم رئیسی”نین اؤلومو ایله اونون واریثی اوچون کئچیریلن سئچکیلرین ایکینجی تورونون باشا چاتماسی آراسیندا ایراندا اعدام حؤکملری‌نین ایجراسی‌نین نیسبتاً آزالدیغی دقته چاتدیریلیب و اعدام ائدیلنلردن ۳۶-نین جزاسی‌نین یالنیز میلاذی ایلین سون آیی‌نین سون ۱۱ گونونده حیاتا کئچیریلیب.
ایران اینسان حاقلاری تشکیلاتی‌نین مودیری “محمود امیری مقدم” دئییب: اؤزللیکله، قارشیداکی هفته‌لرده و آیلاردا نارکوتیک جینایتلرینده اتهام اولونانلارین اعداملارین یئنی دالغاسیندان ناراحاتیق.
او، وورغولاییب کی، بو اعدام دالغاسی‌نین قارشیسینی یالنیز سیویل توپلومون اعتراضلاری و اولوسلارآراسی تضییقلرله سیاسی بدلینی آرتیرماق ایله آلماق اولار.
اولوسلارآراسی عفو تشکیلاتی دونیادا اعدام حؤکمو ایله باغلی اؤزونون سون ایللیک راپوروندا ایراندا اعداملارین کسکین آرتماسینا دقت چکرک، اؤتن ایل دونیادا قئیده آلینان بوتون اعداملارین تخمیناً یوزده ۷۵-نین ایراندا حیاتا کئچیریلدیگینی آچیقلاییب.
