ایراندا اعدام دالغاسی: بیرجندده ۷ محبوس آسیلدی
ایراندا گئنیش یاییلان اعدام دالغاسیندان سونرا بیرجند حبس‌خاناسیندا اوچو قادین اولماقلا داها ۷ محبوس آسیلیب.
هرانا اینسان حاقلاری آژانسی‌نین راپورونا گؤره، داها اؤنجه نارکوتیکله باغلی جینایتلره گؤره اعدام جزاسینا محکوم ائدیلمیش بو ۷ نفرین حؤکملری ۲ مرداد چارشنبه آخشامی سحر ایجرا اولونوب.
بو محبوسلار حؤکمون ایجراسی اوچون ۳۱ تیر بازار گونو آخشام تک آداملیق هوجره‌یه کؤچورولوبلر.
هرانا بو محبوسلاردان ایکیسی‌نین کیملیگینی تصدیقله‌ییب: سوبای، نور محمدین اوغلو،امیر حمزه براهویی و ائولی و ایکی اوشاق آتاسی ۳۳ یاشلی وحید وحدانی اولاراق تصدیقله‌ییب.
بو یئددی محبوسون اعدام ائدیلمه‌سی ایله ایراندا بو ایل (۲۰۲۴) اعدام ائدیلنلرین عومومی سایی ان آزی ۲۸۱ نفره چاتیب.
ایران حبس‌خانالاریندا اعدام حؤکملری‌نین ایجراسی سون هفته‌لر شدتله‌نیب و ۳۰-۳۱ تیرده شیراز و کرج حبس‌خانالاریندا ان آزی ۸ محبوس آسیلیب.
ایراندا اعداملاری ایزله‌ین ایران اینسان حاقلاری تشکیلاتی بوندان اؤنجه جمهورباشقانلیغی سئچکیلریندن سونراکی گونلرده اعداملارین شدتلشه‌جیی ایله باغلی آچیقلاما یایمیشدی.
