اولوسلارآراسی عفو تشکیلاتی: اعتراضلارلا باغلی ان آزی ۱۵ محبوس اعدام تهلوکه‌‌‌سی آلتیندادیر
اولوسلارآراسی عفو تشکیلاتی آدلی سیویل تشکیلات بیر مکتوب یایاراق، ایراندا عومومی اعتراضلارلا باغلی ان آزی ۱۵ محبوسون اعدام ائدیلمه‌سی‌نین جدی ریسکی باره‌ده خبردارلیق ائدیب.
اولوسلارآراسی عفو تشکیلاتی‌نین وئردیگی بیلگیلره گؤره، بو شخصلردن ۸ نفری “قادین، حیات، آزادلیق” قیامینا گؤره حبس ائدیلیب و اعدام جزاسینا محکوم ائدیلیب.
بو اولوسلارآراسی اینسان حاقلاری تشکیلاتی ۳ خرداد گونو ایسلام جمهورییتی عدليه‌‌سی‌نین باشقانی غلامحسین محسنی اژه‌ای‌یه خطابا یایدیغی مکتوبدا بیلدیریب: فاضل بهرامیان، مهران بهرامیان، محمود مهرابی، محمد خضرنژاد، منوچهر مهمان‌نواز، مجاهد کورکور، رضا رسایی و توماج صالحی، قادین، حیات، آزادلیق قیامیندا اعدام محکوم ائدیلیبلر.
بو شخصلرین اتهاملاری‌نین موحاریبه، یئر اوزونده فساد و بغی اولدوغونا توخونان اولوسلارآراسی عفو تشکیلاتی مکتوبوندا اونلارین سون درجه عدالتسیز محکمه‌‌لردن سونرا اعدام جزاسینا محکوم ائدیلدیگینی وورغولاییب.
اولوسلارآراسی عفو تشکیلاتی ۵ اردیبهشت گونو ۲۰۲۳-جو ایل اوچون ایرانلا باغلی راپوروندا یازیب کی، ایسلام جمهورییتی اعدام حؤکموندن موخالیفلره، اعتراضچیلارا و ائتنیک آزلیقلارا قارشی سیاسی تضییق واسطه‌‌‌سی کیمی ایستیفاده ائتمکده داوام ائدیر.
بوندان اؤنجه ۱۶ فروردینده بو تشکیلات ۲۰۲۳-جو ایلده ایراندا ۸۵۳ نفرین اعدام ائدیلدیگینی اعلان ائتمیش و بونو سون ۸ ایلده گؤرونمه‌میش بیر ایش حساب ائتمیشدی.
