اوشاق اثرلری‌نین چئویرمنی پانته‌آ اقبال‌زاده حیاتینا سون قویوب
۶ تیر ۱۴۰۲ بازار ائرته‌سی گونو آخشام ایراندا تانینمیش چئویرمن و یازیچی شهرام اقبال‌زاده قیزی پانته‌آ اقبال‌زاده‌نین حیاتینا سون قویدوغونو اعلان ائتدی.
اوشاق اثرلری‌نین چئویرمنی پانته‌آ اقبال‌زاده اینتیهار ائتمزدن اؤنجه آتاسینا قیسا ال‌یازما یازیب و حیاتینا سون قویماسی‌نین سببلرینی بیلدیریب.
جناب اقبال‌زاده‌نین اینستاگرام حسابیندا شکلی درج اولونان بو مکتوبدا او، “اؤلکه‌نین دورومو”نا گؤره، داوام ائتمه‌یه اومیدی‌نین و موتیواسییاسی‌نین اولمادیغینی یازیب.
پانته‌آ اقبال‌زاده دن قالان اثرلر آراسیندا «طولانی‌ترین شب» نوشته «ماریون دین‌باور»، «خانواده خوب و تمیز مثل ما»، «بچه تمساح»، «جانمی! باز هم کلوچه‌های میوه‌ای!»، «هواپیمای آنجلا» و «شاهزاده خانمی با پیراهن کاغذی» نوشته «رابرت ام. مانش» ساییلا بیلر.
چارشنبه آخشامی گونو ایران مئدیاسیندا ۳۹ یاشلی دهدشتلی ژورنالیست “علی صادقی” یوخسوللوق نه‌دنی ایله اینتیهاری درج اولونوب.
هرانا خبر آژانسی جناب صادقی‌نین عائله‌‌‌سینه یاخین بیر قایناغا ایستناداً یازیب کی، علی بونو یوخسوللوق و ایشسیزلیک اوزوندن ائتدی.
ایرانلی ژورنالیستلر، یازیچیلار و ترجومه‌چیلر سون اونیللیکلرده موختلیف سیاسی و اقتصادی تضییقلره معروض قالیبلار. موختلیف قاداغالار و سانسورلار ایله یاناشی، اونلارین اوغورسوز اقتصادی وضعيتلری‌نین اساس سببی ایش اعتبارسیزلیغیدیر.
ایراندا گئنیش‌میقیاسلی “قادین، حیات، آزادلیق” آکسییالاری‌نین باشلاماسیندان ۹ آی کئچن بیر مدت ایچینده بیر نئچه اعتراضچی‌نین حبسدن چیخدیقدان سونرا اینتیهار ائتمه‌سی خبری سوسیال شبکلرده بؤیوک ماراغا سبب اولوب.
