اعدام ائدیلن اعتراضچی محمد مهدی کرمی‌نین آتاسی حبس ائدیلیب
حؤکومت قوه‌لری چارشنبه آخشامی، ۳۱ مرداد گونو اعدام ائدیلمیش اعتراضچی محمد مهدی کرمی‌نین آتاسی ماشاالله کرمی‌نین ائوینه باسقین ائدیب و اونو حبس ائدیبلر.
بو خبری آچیقلایان بیلگیلی قایناق ایران‌وایره بیلدیریب کی، حؤکومت مامورلاری امیرحسین کوهکن، وکیل محمد مهدی کرمی‌نی ده حبس ائدیبلر.
ایران ایسلام جمهورییتی‌نین مامورلاری ماشاالله کرمی‌نین ائوینه باسقین زامانی اؤزلری ایله نووتبوک و موبیل تلفون کیمی الکترون جیهازلاری آپاریبلار.
ماشاالله کرمی‌نین اوغلو محمد مهدی کرمی ایراندا عومومی اعتراضلار زامانی کرجده حبس ائدیلیب و اؤتن ایل ۱۷ دی گونو سید محمد حسینی ایله بیرلیکده اعدام ائدیلیب.
سون گونلر عومومی اعتراضلاردا اؤلنلرین عائله‌‌‌لرینه گوونلیک قوروملاری‌نین تضییقلری چوخلو آرتیب و بو عائله‌‌‌لرین بیر چوخ عضوو مامورلار طرفیندن حبس ائدیلیب.
بو چارشنبه آخشامی سحر سقزده گوونلیک گوجلری بو شهرده‌کی عومومی اعتراضلارین قوربانلاریندان بیری اولان فریدون محمودی‌نین حیات یولداشی شرمین حبیبی‌نی حبس ائدیب.
دونن اولوسلارآراسی عفو تشکیلاتی راپوروندا ایراندا “قادین، حیات، آزادلیق” اعتراضلاری‌نین قوربانلاری‌نین عائله‌‌‌لرینه آرتان تضییقلره قارشی خبردارلیق ائدرکن، ” عائله‌‌‌لری سوسدورماق و بو جینایتلری تؤره‌دنلری جزادان قوروماق اوچون قورخودولماسینی” تنقید ائدیب.
بو تشکیلات اؤز راپوروندا ایران اعتراضلاریندا اؤلنلرین عائله عضولری‌نین یاخینلاری‌نین مزارلاری باشیندا مراسیم کئچیردیکلرینه گؤره تحقیر‌ائدیجی سورغو-سؤاللارا، اساسسیز حبسلره، تعقیبلره، تهدیدلره و عدالتسیز جزالارا معروض قالدیقلارینی وورغولاییب.
