اؤیرنجی فعال لیلا حسین‌زاده توتولدو!
اؤیرنجی فعال لیلا حسین‌زاده چارشنبه آخشامی، ۱۶ آذر ۱۴۰۰ شیرازا گئدرکن گوونلیک گوجلری طرفیندن توتولوب. بو گونلرده بو اؤیرنجی فعال تهران تئمییز محکمه‌‌سی‌نین ۳۶-جی شؤبه‌سینده ۵ ایل حبسه محکوم ائدیلیب.
سوسیال مئدیا فعاللاری ۱۷ آذر ۱۴۰۰ چارشنبه گونو یازیبلار کی، لیلا حسین‌زاده اؤیرنجی گونونده ۱۵-دن چوخ گوونلیکگوجلری طرفیندن توتولوب.
لیلا حسین‌زاده‌نین وکیلی امیر رئیسیان ۱۴ آذر بازار گونو خانیم حسین‌زاده‌نین حبس خبرینی توییتر حسابیندا آچیقلاییب و بیلدیریب کی، بو جزا آچیق شکیلده جینایت قانونونا ضدیر.
تهران اینقیلاب محکمه‌‌سی‌نین ۲۸-جی شؤبه‌سی داها اؤنجه لیلا حسین‌زاده‌نی میلی گوونلیگه قارشی حرکت ائتمک آماجی ایله ال بیر اولماق اتهامی ایله ۵ ایل حبس جزاسینا محکوم ائتمیشدی.
خانیم حسین‌زاده‌نین وکیلی‌نین سؤزلرینه گؤره، اونا قارشی ایره‌لی سورولن اتهاملار “اؤیرنجیلرین کیچیک بیر توپلانتیسینی تشکیل ائتمک” و اؤیرنجی و حبسده اولان درویش محمد شریفی مقدمین آد گونونو تبریک ائتمک اوچون تشکیل ائدیلن بو توپلانتیدا لیلا حسین‌زاده‌نین قاتیلیمینا اساسلانیر.
لیلا حسین‌زاده‌یه وئریلن حؤکمده، بو آد گونونده “خون ارغوانها” مارشی‌نین اوخونماسی، اؤلکه‌نین گوونلیگینه قارشی حرکت ائتمک نيتی ایله توپلاشماق و ال بیر اولماق نومونه‌سی ساییلیر.
حؤکمده لیلا حسین‌زاده‌نین محمد شریفی مقدمین آد گونونده “خالق فداییلری قروپونا عاید ائدیلن خون ارغوانها مارشینی اوخویان “سولون اساس لیدرلریندن” بیری اولدوغو ادعا ائدیلیر.
لیلا حسین‌زاده تهران بیلیم‌یوردونون اؤیرنجیسی‌دیر کی، ۱۳۹۶-جی ایلین دی اعتراض آکسییالاری زامانی توتولوب و حبس و سیاحت قاداغاسینا محکوم ائدیلیب.
#ایران_خبرلری #سیاسی_محبوس #لیلا_حسین‌زاده
