“آمدنیوز” پرونده‌سی‌نین موتهیملری اوچون ادعانامه چیخاریلدی؛ شیرین نجفی ایران‌دادیر
محکمه سؤزچوسو غلامحسین اسماعیلی، آمدنیوز تلگرام کانالی‌نین ایکینجی ادمینی شیرین نجفی ده داخیل اولماقلا روح‌الله زم پرونده‌سی‌نین باشقا موتهیملرینین اتهامی ایله باغلی سؤالا جاواب اولاراق دئدی: “بو پرونده‌نین گئنیش اؤلچولری واردیر. بو پرونده‌نین بیر حیصه‌‌‌سی اوچون قرار وئریلدی، آنجاق بو پرونده بیتمه‌ییب.”
ایرانداکی مئدیالارین وئردیگی بیلگیلره گؤره، محکمه سؤزچوسو، ۱۶ دی ۱۳۹۹-جو ایل چارشنبه آخشامی گونو آمدنیوز پرونده‌سی اوزره موتهیملره حؤکم وئریلدیگینی سؤیله‌دی و دئدی: “بو یاخینلاردا، تهران عومومی و اینقیلاب ساوجیلیغی طرفیندن ادعانامه‌نین چیخاریلماسیندان سونرا، روح‌الله زم پرونده‌سی اوزره داها آلتی موتهیمه حؤکم چیخاریلدی و ایکی ایلدن 10 ایله‌دک حبس جزاسی وئریلدی.”
محکمه سؤزچوسونون سؤزلرینه گؤره، شیرین نجفی موحاکیمه اولوندوقدان سونرا محکوم ائدیلدی و ایندی پرونده‌سی “تئمییز” مرحله‌‌‌سینده‌دیر.
او باشقا بیر موتهیمین موحاکیمه اولوناجاغینی و محکمه اوتورومونون گلن هفته کئچیریله‌جه‌یینی سؤیله‌دی.
بو پرونده اوزره باشقا موتهیملر آراسیندا محکمه اوتوروموندا اؤزونو آمدنیوزون تئکنیکی مودیری کیمی تقدیم ائدن 2 تیر 1374-جو ایل دوغوملو توانا محمدی ده وار.
