آلمانییا مجلیسی‌نین نوماینده‌‌لریندن بیری محمد قبادلونون سیاسی کفالتینی قبول ائدیب
سون گونلر اعتراضچیلارا وئریلن اعدام حؤکملرینه اعتراضین داوامیندا آلمانییا مجلیسی‌نین نوماینده‌‌لریندن بیری محمد قبادلونون سیاسی کفالتینی قبول ائدیب.
آلمانییا سول پارتییاسی‌نین نوماینده‌‌سی کلارا بونگر بیلدیریب: موللا رئژیمی‌نین قدارلیغی و زوراکیلیغیندان دهشته گلیرم. بو سببدن من فدرال مجلیسین عضوو اولاراق محمد قبادلونون حیاتینی و آزادلیغینی قورتارماق اوچون نسه ائتمک اوچون اونون سیاسی کفالتینی اؤز اوزریمه گؤتوردوم.
۲۲ دی ۱۴۰۱-ده ۱۵۰۰ تصویر آدلی حسابدا حبس ائدیلمیش اعتراضچیلاردان محمد قبادلونون حبسده ساخلاندیغی کرجده‌کی رجایشهر زیندانی اطرافینا چئویک قوه‌لرین یئریدیلمه‌سی ایله باغلی ویدئو یاییملانیب.
۱۳۷۹-جو ایلده آنادان اولان قبادلو بیر پولیس مامورونو اؤلدوردویونه و داها بئش مامورو اتومبیل ایله ازیب یارالادیغینا گؤره “دؤیوش” و “یئر اوزونده فساد” اتهامی ایله اعدام جزاسینا محکوم ائدیلیب.
ایراندا اعتراضلارین سرت شکیلده یاتیریلماسی و اعتراضچیلارا اعدام حؤکملری‌نین وئریلمه‌سی ایله عینی واختدا ایسلام جمهورییتینه قارشی گئنیش تنقیدلر ایره‌لی سورولوب. ایسلام جمهورییتی اعداما محکوم ائدیلنلرین بعضیلری‌نین سیاسی کفالتینی قبول ائتمه‌سینه باخمایاراق، کئچن هفته محمدمهدی کرمی و محمد حسینی‌نی اعدام ائدیب.
