آبان اعتراضلاری توتولانلاریندان اولان مهرداد شیخی، اردبیل مرکزی حبس‌خاناسی‌نین سویغونچولوق بندینه کؤچورولدو
بیلگیلی بیر منبع ایران‌وایره بیلدیریب، اردبیلده یاشایان و ۹۸ آبان اعتراضلاری آکسییالاری‌نین محبوسلاریندان اولان آذربایجانلی مدنی فعال مهرداد شیخی، اردبیل حبس‌خاناسی‌نین سلامت بندیندن ایکینجی بنده (سویغونچولوق بندینه) کؤچورولوب.
مهرداد شیخی ۲ خرداددا ۷ سایلی گوونلیک بندیندن اردبیل مرکزی حبس‌خاناسی‌نین سلامت بندینه کؤچورولموشدو.
۷ خرداد تاریخینده آذربایجانلی مدنی فعاللار، اردبیلده‌کی مرکزی حبس‌خانانین سلامت بندینده حبسده اولان آذربایجانلی سیاسی محبوس مهرداد شیخی‌نین گرافیتیسینی چاپ ائده‌رک گوونلیک اورقانلارینا بو آذربایجانلی فعالا قارشی تطبیق اولونان حاقسیز حبس و سیاسته قارشی اعتراض ائتدیلر.
۸ خرداد ۱۴۰۰-جو ایل شنبه گونو اردبیلده‌کی آذربایجانلی فعاللار “منیم سسیم، دوشونجم و عباس لسانی‌یه”، “سسیم سیاسی محبوسلارین آزادلیغینا”، “عباس لسانی، منیم سسیم “و” “آذربایجان خالقی‌نین سئچیلمیش نوماینده‌‌سی حبسده‌دیر” دئیه‌رک قارشیداکی سئچکیلره قاتیلمایاجاقلارینی وورغولادیلار.
خاطیرلاداق کی، اردبیل حبس‌خاناسی‌نین مسووللاری ۷ اردیبهشتده مهرداد شیخی و یوسف کاری ایله گؤروشه‌رک تعهد قارشیلیغیندا حبسلری‌نین قالان حیصه‌‌‌سی‌نین باغیشلانماسی و حبسلرینه سون وئریلمه‌سینی تکلیف ائتدیلر کی بو ایکی تورک سیاسی محبوس بو تکلیفی رد ائتدیلر.
مهرداد شیخی‌ده، کئچن ایل اسفند آیینین باشیندان بری ۶ آیلیق حبس جزاسینی کئچیرمک اوچون اردبیل حبس‌خاناسینا کؤچورولدو.
بو آذربایجانلی مدنی فعال، ۲۹ آبان ۱۳۹۸-جی ایلده آتاسی‌نین ائوینده بِنزینین باهالاشماسینا قارشی عوموم‌میللی اعتراض آکسییالاری ایله عینی واختدا توتولدو و عینی ایل ۹ آذرده ۳۰ میلیون تومن گیروو قارشیلیغندا سربست بوراخیلدی. داها سونرا ادربیلین انقلاب محکمهسینده بیر ایل حبس جزاسینا محکوم ائدیلدی کی بو حؤکم ده تئمییز محکمهسینده آلتی آی حبس جزاسینا ائندیریلدی.
مهرداد شیخی، حاضردا اوین حبس‌خاناسی‌نین ۸-جی بندینده اولوسلاراراسی آنا دیلی گونونون قئید اولونماسی ایله باغلی ایکی ایل حبس جزاسی چکن باشقا آذربایجانلی فعال بهنام شیخی‌نین قارداشیدیر.
iranwire
