سايير حركتلر

آنادیلینده تحصیل آلماق هر اوشاغین دوغال حاققی دیر!

"بیرلیک"ین دونیا آنا دیلی گونو موناسیبتی ایله – 2015، بیاناتی

اوشاق لارین یاشامینین ایلک گونلریندن اؤره نمه یه چالیشان دیل، عؤمور بویو اونلارین حیاتی نین آیریلماز بیر بؤلومو اولموشدور. دیل اوشاقلار لا آنالارین، آتالارین و چئوره نین آراسیندان بیر اؤنملی باغ اولموشدور. دیل اینسانین ایلک گونلردن، یاشامین سون آنلارینا قدر اونون حیسسیاتین، سئوینجین، هیجانین و بیلیمی نین سونولاماسینا چوخ جیددی بیر واسیطه اولموشدور. آنا دیلی اوشاغین حیاتیندا بو دانیلماز رولونا باخمییاراق، گئری قالمیش اؤلکه لرده استبداد و سؤمورگه چی دئولت لرین طرفیندن چوخ آغیر باسقییا معروض قالمیشدیرلار. او اؤلکه لرده حاکیم میللتین دیلی، محکوم میللت لرین دیللرینین یئرینه قویولموش و بو واسیطه ایله غیرحاکم دیللر آیریسئچگی لیه، تحریفه و حتی او دیللرین اینکار اولماسینا سبب اولموشدور.

ایران دئولتی (پهلوی لر سلاله سی و بوگون ایسلام جمهوروسو)، سون 90 ایلده اینانیلماز بیر فورمادا، غیرفارس دیللری او جمله دن "تورک" دیلینی شیدتلی بیر واسیطه ایله باسقی و آیری سئچگی لیه معروض قویمدشدور. میلیونلارجا اوشاق آزربایجان دا و ایرانین باشقا بؤلگه لرینده اؤز آنا دیلینده تحصیل آلماق حاقینیدان محروم قالمیشدیلار. ایران دئولتی نین گئچمیش تحصیل ناظیری حمید رضا بئی حاجی بابایی دئیر کی ایرانین تامام مکتب لریندن اولان اؤرنجی لرین یوزده 70ی غیرفارس اوشاقلاردان تشکیل اولونور. بو او دئمکدیر کی ایران دا یاشایان اوشاقلارین 70% آنا دیلینده تحصیل آلابیلمیرلر و بو اؤلکه ده مدنیت (فرهنگ) بودجه سی نین 100% یالنیز اؤلکه ده یاشایان اوشاقلارین 30% دیللرینین اینکیشافینا صرف اولونور.

 

بو آچی دان، هر ایل فورالین 21ین آنا دیلینین آغیرلاماسی ، "دونیا آنا دیلی گونو" آدلاندیرماسی، بیر طرفدن "آنا دیل لرینین اؤنمی" و بیر باشقا طرفدن "سؤمورگه چی دئولت لرین باسقی سیاستینه معروض قالان دیللره ده یر وئرمه دن" قایناقلانیر. فورالین 21ی، دونیا آنا دیلی گؤنو گونئی آزربایجان دا و ایرانین هر بیر بوجاقیندا یاشایان تورک اوشاقلارینا دا اونلارین دیللرینین اؤنم سه مه و آغیرلاماسی جیددی بیر اؤنم داشییر. بلکه ائله بو آچیدان دا ایندیه قدر ایران دئولتی "دونیا آن دیلی گونو"نو طنطنه لی گئچیرمه سینه قارشی دیر.

 

بوگون، گونئی آزربایجان دا و ایرانین هر بؤلگه سینده، غیرفارس اوشاقلارین، آنا دیلینده تحصیل آلماق حاقی یوخ، بلکه "دونیا آنا دیلی گونون" آغیرلاماق و سمینار گئچیرمک ایران دئولتی نین دیللره قارشی ایرقیچی سیاستینه اویقون گلمیر. ائله بونا گؤره ده سون گونلرده آزربایجانین مدنی فعالاری "دونیا آنا دیلی گونونو قوتلاماق موجوویزین ایران دئولتین‌دن آلماق" اوچون بیر کامپانیا آپاریرلار.

 

بیرلیک، بین الخالق حقوقا و او جمله دن دونیا آنا دیلی حاققی بیاننامه سینه دایاناراق، آنا دیلین ده تحصیل آلماق حاقینی، گونئی آزربایجان دا و ایران چاپین دا یاشییان تورک اینسانی نین دوغال حاققی تانیر و بو حاققی الده ائتمک و ایران دا آنا دیلینده تحصیل ائتمک حاققیندا عمومی افکار یارالتماق اوچون "دونیا آنا دیلی گونو"نون هر نه قدر طنطنه لی و گئنیش آغیرلاماغینین طرفداریدیر.

بیرلیک

2015-02-13

قایناقلار:

1-ایران ین گئچمیش تحصیل ناظیری حمید رضا حاجی بابایی دئیر کی، ایرانین تامام مکتب لرینده اولان اوشاقلارین 70% غیرفارس دیرلار.

http://www.edunews.ir/index.php?view&sid=23573