راسيسم

محمد امین آزاد وطن

memmedemin-azadveten "بو یازی «آزادلیق یولوندا مبارزه» آدلی کیتابین “محمد امین آزاد وطن” بؤلوموندن آلینمیشدیر"

 

محمد امین آزاد وطن اورمی نین نازلی چای محالینداندیر. او ، اوللر قدیم اصولدا ، سونرا اورمی شهرینده  ابتدائی مکتبده اوخوماغا باشلاییر، لاکن ئوز تحصیلینی آخرا قدر دوام ایتدیره بیلمیر.

 

 

بیر چوخ جوانلار کیمی محمد امین ده اقتصادی چتین لیکلر اوزوندن تحصیلدن محروم ایدیلیر، اونون ایلکین معلمی ده همین محرومیت اولور. او ایشله مک ایسته ییرسه، ایش تاپا بیلمیر. نهایت ، هر آدیمدا ینی بیر چتین لیک، ینی بیر محرومیت محمد امینی ده محروم آداملار جرگه سینه، موجود قورولوشدان ناراضی اولانلار سیراسینا چکیب گتیریر. او هله جوان ایکن اجتماعی مبارزه میدانینا قدم قویور. آزاد وطن رضا خانین خلقین منافعینه ضد سیاست و مقصدلرینی اهالی ایچرسینده افشا ایدیر. او ، اورمی کندلیلرینی حکومتین، اربابلارین قانونسوز حرکتلرینه قارشی مبارزه یه چاغیردیغی ایچون وقتیله پولیس مامورلارینین، اورمی فرمانده لشگرینین دقتینی جلب ایدیر. او ، بیر نچه دفعه پولیس اداره سینه چاغیریلدیقدان سونرا، نهایت سیاسی جهتدن «اعتبارسیز» آدام کیمی سیاهییه آلینیر و ۱۳۱۲- نجی شمسی ایلده اورمی قوشون فرماندهی طرفیندن توتولور، بیر مدت اورمییده زندانی ساخلاندیقدان سونرا عمرلیک اولاراق زنجانا تبعید اولونور. زنجانین نظمیه اداره سی و فرماندارلیغی آزاد وطنین فعالیتینین قارشیسینی آلماق مقصدیله اونی نظارت آلتینا آلیر و موقتی اولاراق زنجان بلدیه سینده سوپورگه چیلرین باشچیسی وظیفه سینده ایشه قبول ایدیرلر.

 

آزاد وطن شخصی مطالعه و حیات تجربه لری نتیجه سینده بیشیب برکیمیش مبارز بیر انسان، آچیق فکرلی وطن پرست و اجتماعی حادثه لره دوزگون قیمت ویرمگی باجاران تشکیلاتچی ایدی. او ، کتله نین حقیقی قدرتینی درک ایدره ک همیشه بو قدرتین بیر تشکیلات حالیندا بیرلشمه سینه چالیشیردی. گله جگه محکم امید و اینام بسله ین آزاد وطن همیشه صحبت زمانی دییردی: «بیز سوپور گه چیلر و باشقا زحمتکشلر گوجوموزی بیر یره توپلایا بیلسه ک خلقین آزادلیغینا، مملکتین ترقیسینه انگل اولان هر بیر مانعه نی آرادان آپارا بیله ریک ».

 

آزاد وطن زنجاندا سکگیز ایل تبعیدده قالدیغی زمان ایش یولداشلاریندان و سور گونده اولانلاردان علاوه بیر چوخلارینین حرمت و محبتینی قازانمیش، اونلاری ئوز مترقی فکرلرینه طرف جلب ایده بیلمیشدی. او، بو حرمتدن استفاده ایدره ک کتله ایچریسینده تبلیغات آپاریر. موجود قورلوشون عیبه جرلیکلرینی آچیب گوستریر، رضا خانین امپریالیستلرین عاملی اولدوغونو هامییا باشا سالیردی. نهایت ، ۱۳۱۹- نجی ایلین پائیزیندا، او، سیاسی فعالیت اوستونده ینیدن زندانا دوشور. اونی دورد آی زنجان نظمیه سینده ساخلادیقدان سونرا تهرانین« قصر قاجار» زندانینا گوندریرلر.

 

۱۳۲۰- نجی ایلده رضاخان دیکتاتورلوغونون یخیلماسیله ایران خلقلرینین حیاتیندا ینی بیر دور باشلانمیش اولور. ایللر بویی زندان و سور گونلرده قالمیش وطن پرستلر، ترقیخواه آداملار آزاد اولورلار. بو زمان آزاد وطن ده باشقا زندانیلرله برابر آزاد اولوب زنجانا قاییدیر. او زنجاندا حزب توده ایران تشکیلاتلارینین یارانیب گنیشلنمه سینده گورکملی خدمتلر ایدیر و آز بیر زماندا گوستردیگی فعالیتی نظره آلیناراق حزبین مرکزی کمیته سی طرفیندن تقدیرنامه آلماغا موفق اولور.

 

۱۳۲۲- نجی ایلین آخرلاریندا آزاد وطن ئوز دوغما شهری اورمییه گله ره ک بورادا دا حزب توده ایران تشکیلاتینین یارادیلماسیندا و محکم لندیریلمه سینده فعال اشتراک ایدیر. آزاد وطن خلق ایشینه صداقتی و تشکیلاتچیلیق لیاقتی نتیجه سینده اورمی حزب توده ایران تشکیلاتینین کمیته صدری سچیلیر. بو زمان مشهور جانی سرهنگ زنگنه اورمی نین تیپ فرماندهی ایدی. ایستر اوردو داخلینده ایسترسه باشقا دولت اداره لرینده زحمتکشلرین حقوقونا، اونلارین آزادلیغینا قارشی حاضرلانان هر بیر توطئه وقتلی وقتینده تشکیلات طرفیندن افشا اولونوردو. آزاد وطن اورمی تیپینین نظامی ساخلولارینین داخلینه نفوذ ایتمک ایچون چالیشمیش و بو ایشده بیر سیرا موفقیتلر ده الده ایتمیشدی.

 

۱۳۲۴- نجی ایلده آذربایجان دموکرات فرقه سینین تشکیلیندن سونرا، او ینه ده اورمی کمیته سینده ئوز تشکیلاتی فعالیتینی دوام ایتدیره رک فرقه نین شعارلارینی، مرامنامه و مقصدینی کتله لره ایضاح ایتمکده وار قوه سینی صرف ایدیری.  آلوولی وطن پرست ئوز حرارتلی نطقلریله، کسگین منطقیله زحمتکشلرین آذربایجان دموکرات فرقه سینین بایراغی آلتیندا بیرلشمه لرینده، شانلی ۲۱ آذر نهضتینین حاضرلیق ایشلرینده گورکملی خدمتلر ایتمیشدیر. نهضتین ان مسئول دقیقه لرینده آزاد وطن فدائی لرله چیگین- چیگینه، صدری اولدوغی تشکیلاتین عضولریله بیرلیکده قاتل سرهنگ زنگنه یه قارشی ووروشور و اورمی فدائیلر شوراسینین صدری کیمی فرقه نین امر و گوستریشلرینین یرینه یتیریلمه سینه چالیشیردی.

 

آزاد وطن آذربایجان دموکرات فرقه سینین بیرنجی قورولتاییندا نماینده کیمی اشتراک ایتمیش و آداف مرکزی کمیته سینه عضو سچیلمیشدیر. او، ملی مجلس نماینده سی انتخاب اولونموش و ملی حاکمیت دورونده حکومت و فرقه طرفیندن اونا ویریلن ماموریتلری لایقینجه یرینه یتیرمیشدیر. او، خلق حرکاتیندا اشتراکینا گوره شانلی ۲۱ آذر مدالی ایله تلطیف ایدیلمیشدیر.

 

۱۳۲۵- نجی ایلده شاهنشاه اوردوسی آذربایجانا خائنجه سینه باسقین ایتدیکده آزاد وطن ده خائن تهران حکومتی طرفیندن توتولور. قوام حکومتی نین رسمی مامورلاری اونی همکارلیغا، ایللر بویی صداقت و متانتله آددیملادیغی یولون عکس استقامتینده حرکته دعوت ایتدیکده آزاد وطن اونلارا:«جلادلار! چنار آغاجی سینار- لاکن اگیلمز!…» – دییه جواب ویرمیشدیر.
آلچاق دشمن آزاد وطنین قارشی سیندا «یا ئولوم! یا مسلکه قارشی چخماق!» – مسئله نی بو قدر کسگین و قطعی قویموشدی. لاکن قوجامان آزادیخواه غدار و حیله گر دشمنه «یوخ!» دیمکله شرافتلی ئولومی شرفسیز یاشاماقدان اوستون توتدوغونو بیلدیرمیشدیر.آزاد وطن مردلیک و شرافتله یاشادیغی کیمی آزادلیق اوغروندا ئولومی ده شرف و مردلیکله قارشیلامیشدیر.

 

او، ئوز انقلابی متانتی، پولاد کیمی محکم اولان عزم و اراده سیله دشمنی ده، ئولومی ده ئوز قارشیسیندا دیزه چوکمگه مجبور ایتمیشدیر. او، قوجامان بیر چنار کیمی سیندی، لاکن اگیلمه دی. آذربایجان خلقینین مبارز اوغلی ، آذربایجان دموکرات فرقه سینین، ملی نهضتینین گورکملی خادمی فیزیکی جهتدن سیندیسا، معنوی جهتدن یاشاییر و یاشایاجاقدیر.

 

او، ساغ ایکن ئوز شعورلی فعالیتیله آذربایجان خلقینین نهضتینه، ایران خلقلرینین آزادلیق حرکاتینا خدمت ایتمیش، شهید اولارکن آزادلیق یولونون مرد مبارزلر تاریخینه قیزیل صحیفه علاوه ایتمیشدیر.

 

منبع: اویان نیوز