ديالوق و پولميك

محمد انصاری: موغاما چوخ اوستونلوک وئریرلر، اونو ”خطرسیز” گؤرورلر

memmed ensari“بیر موسیقی ژانری خالق طرفیندن سئویلرک اوستونلوک قازانسا نورمالدیر. . . آنجاق بو یوخاریدان تحمیل اولونارسا، باشقا موسیقی نؤوع لرینین یئرینی کیچیلدر،” دئیه گونئیلی موسیقیچی محمد انصاری صنعت ساحەسینده آوتوریتار یاناشمالاری تنقید ائدیر.

 اینگیلتره ده یاشایان گونئیلی بستەکار آمئریکانین سسی ایله صؤحبتده، آذربایجان جمهوریتی و ایران آذربایجانیندا مؤوجود اولان موسیقی ژانرلاری،”آذربایجان موسیقیسی” تئرمینینین آنلامی، آذربایجان و آنادولو موسیقیسینین تماس نؤقطەلری، گونئیین فرقلی بؤلگه لرینه مخصوص موسیقی نؤوع لرینین کیفایت قەدر تانینماماسی، ائلەجه ده موسیقی ساحەسینده آوتوریتار یاناشما کیمی مؤوضوع لارلا باغلی دوشونجەلرینی ایفاده ائدیب.

 موسیقی اوزەره عالی تحصیلینی آذربایجان جمهوریتی و اینگیلتره اونیوئرسیتئتلرینده آلمیش گونئیلی موسیقیچینین سؤزلرینه گؤره، گونئی آذربایجاندا یئترلی ایمکانلار، او جوملەدن مئدیانین اولماماسی اوزوندن فرقلی بؤلگەلرین موسیقیسی آرادان گئتمکدەدیر. او، همچینین موسیقی ساحەسینده آپاریلان فارسلاشدیرما سییاستینه ایشاره ائدیب.

 محمد انصاری گونئیین بعضی بؤلگەلری او جوملەدن، قربی آذربایجان، زنجان، همدان، کردستان، مرکزی، قم و کرمانشاه ویلایتلرینده یاشایان تورکلره مخصوص موسیقی نؤوع لرینین آذربایجانین دیگر بؤلگەلرینده کیفایت قەدر دیقته آلینماماسینین سببلری حاقیندا دا دانیشیب.

 اونون دئدیکلەرینه گؤره، بونلارین هامیسی تورک مدنییتینین ائلئمئنتلری و اساسن آذربایجانین موسیقیسی اولاراق تانینمالیدیر. همچینین، اونون فیکرینجه، آذربایجاندا بعضی موسیقی نؤوع لرینه داها چوخ اوستونلوک وئریلدییی اوچون دیگر موسیقی نؤوع لری اینکیشاف ائتمیر.

 محمد انصاری بیر موسیقی ژانرینین آنجاق خالق طرفیندن سئویلرک اوستون مؤوقئع قازانماسینین دوغرو اولدوغونو وورغولاییر و بونون یوخاریدان تحمیل ائدیلمەسینی دوزگون حئساب ائتمیر. اونون سؤزلرینه گؤره، حاکیمییتین موغام موسیقیسینه حدیندن آرتیق اؤنم وئرمەسی، باشقا موسیقیلرین کناردا قالماسینا سبب اولور.

“آذربایجاندا موغام خطرسیز بیر موسیقی کیمی گؤرولدویو اوچون داها چوخ دستکلنیر و بو باشقا موسیقی نؤوع لرینین یئرینی کیچیلدیر،” دئیه او سؤیلەییب.

 اونون سؤزلرینه گؤره، گونئی آذربایجان بؤلگه لرینه مخصوص موسیقیلرین دیقته آلینماماسینین بیر سببی ده تانیتما ایشلرینین یاخشی آپاریلماماسیدیر.

21 آذر سیمفونیک پوئماسینین موللیفی مرکزی اورمو اولان قربی آذربایجان ویلایتینی موسیقی و کولتور باخیمیندان آذربایجان و آنادولونون تماس نؤقطەسی کیمی دەیەرەلندیریر.

“باتی آذربایجان بیر تماسی نؤقطەسی کیمیدیر. میثال اوچون بیز بو بؤلگەلرده آنادولوداکی موسیقی ایله یاخینلیق گؤروروک. بئله تماس نؤقطەلرینده، آذربایجان و آنادولونون تورک موسیقیلری بیر-بیرلرینین اوزانتیسیدیر،” دئیه محمد انصاری بو یاخینلیغین موثبت اولدوغونو وورغولاییب.

“بونلارین هامیسی تورک موسیقیسیدیر. . . تورک دیلینین فرقلی لهجەلری آراسیندا کسین سینیر چەکه بیلمەدیییمیز کیمی، تورک موسیقیسی اوچون ده بئله بیر سینیر مؤوجود دئییل. آنجاق، یوخاریدان بونلارین آراسینداکی فرقی بؤیوک گؤستەرمک شکلینده بیر یاناشما واردیر،” دئیه او علاوه ائدیب.

علیرضا قولونجو

 

 

 

بو یازی یوردنت طرفیندن عرب الیفباسینا کوچورولموشدور

 

 

 

موصاحیبه نی بو لینکدن دینله یه بیلرسینیز:

http://www.amerikaninsesi.org/content/guney-azerbaycan-musiqi/1966330.html