سعيد عزيزي: بو "پارلامئنت"ين حقوقي، تکنيکي و سياسي مشروعيتي يوخدور
- منتشر شده در سه شنبه, 19 فروردين 1393 12:49
- Super User
- بازدید: 2565
بيرليک- مئديا: بيرليک تشکيلاتينين عوضوو سعيد بَي عزيزي، 3 آپرئل تاريخينده اوجاق تی‌وی-يه وئرديگي موصاحيبه‌ده کوپئنهاگئنده باش وئرنلر حاقيندا دانيشميشدير. سعيد عزيزي، موصاحيبه‌ده بو اوتوروما دعوت آلديغي و اوتورومدا گئدن صؤحبتلر حاقيندا فيکريني بيلديرميشدير.
سياسي آکتيويست سعيد عزيزي، پارلامئنتين اولماسيني گرکلي حساب ائتسه ده بير نئچه ساعات ايچينده پارلامئنت قورولماسيني يانليش آدديم حساب ائدير. کوپئنهاگئنده بير آرايا گلن محدود اينسانلار، گونئيده‌کي ويا خاريجده‌کي آذربايجانليلاري تمثيل ائتمه‌ديگيني ايره‌لي سوره‌رک، سورجين يانليش اولماسييلا بيرليکده تمثيل بؤهرانينين اولدوغونو ده وورغولاميشدير.
ايسوئچده ياشايان سياسي آکتيويست موصاحيبه‌ده حاقلي تنقيدلرله ايران دؤولتينه باغلي اولان قوروملارين تخريبات ماهيتلي رئکاسييالاري و بير سيرالارينين ديقتسيزجه‌سينه قوزئيلي‌لرين ايشه قاريشماسي حاقيندا ايشله‌نن گرکسيز ايفاده‌لري آييرد ائتمه‌يه ده چاليشميشدير.
حقوقچولارين، اوزمانلارين اولماديغي بير شراييطده تله‌سيک بير شکيلده اوچ ساعات ايچينده پارلامئنت قورماغي يانليش حساب ائدن سعيد عزيزي، سياسي ائليتادان اؤنجه، حقوقچولارين بو مسئله‌ده اولماسينين گرکليليگيني وورغولاياراق، اينديکي آدديمين غئيري- حقوقي بير آدديم اولدوغونو بيلديرير.
سعيد بَي‌ين سؤيله‌ديگينه گؤره يازيلي اولاراق تشبوث قروپونون يارانماسيني ايره‌لي سورموشدور. بو ايسه بياناتدا اؤز عکسيني تاپماماقدادير.
سعيد بَي‌ين فيکرينه گؤره فرقلي دوشوننلر، فرقلي ايدئوژيلره اينانانلارين چاغيريلماديغي بير شراييطده، عئيني دوشونجه‌ده اولانلار بير آرايا گليرسه بونون اوچون پارلامئنت دئييل، پارتييا قورماقلاري اويغوندور. او، عئيني دوشونجه‌يه صاحيب اينسانلارين پارلامئنت قورماق يؤنونده چاليشماسي، پارلامئنت مسله‌سيني تام آنلاماماقدير- دئيه وورغولايير.
سعيد بَي، کوپئنهاگئنده‌کي بياناتي ايمضالايانلارين سونرادان سؤیله‌دیکلری ضدیتلی فيکير و ايفاده‌لره ده توخونور.
حقوقي، سياسي و تکنيکي باخيمدان مشروعيتي اولماديغيني بيلديرن سعيد عزيزي، هئچ بير حالدا بونا "پارلامئنت" آدي وئرمه‌یين مومکون اولماديغيني دا وورغولامیشدیر.
سعيد عزيزي‌نين اوجاق تی‌وی ايله موصاحيبه‌سيني بو آدرئسدن ايزله‌يه بيلرسينيز:
https://www.youtube.com/watch?v=KwENWN0yV_I&feature=youtu.be