خانه/ ائو

گونئيده ادبي تنقيد، ادبياتين آپاريجي گوجونه چئوريلمه ليدير… / اسمیرا فواد

Esmira fuadکوچورن: ائلیار پولاد


قئيد ائدک کي، سون ايللرده بو ساحه ده خوصوصي جانلانما حيس اولونور. اوللر ديقتدن کنار قالميش ادبي تنقيده بؤيوک ماراق، رغبت و ديقت آرتميشدير. ادبي تحليل يازيلاري ايله مطبوعاتدا آرا-سيرا چيخيشلار ائدن، ادبي تنقيد ساحه سينده کي بوشلوقدان، شئير توپلولارينداکي قوصورلاردان يانا بير ضيالي ناراحاتليغي دويان جعفر بزرگ امين ده بو ساحه ده کي ايره ليله یيشي نظردن قاچيرمير:

«انجاق گنجلريميزين شعري نين نئجه ليگي و خاراکتئري اوست-اوسته شوعارچيليق و اؤيود-خطابه دن اوزاقلاشماق، شعرده ديل و فورمانين اؤنمسنمه سي، اؤزل شاعيرانه باخيشلار، غزل، فولکلور، آشيق شعري، مودئرن، پوست مودئرن شعر ائستئتيکا ايزلرينين گؤرونمه سي اولوب. بو گون شعريميزين قارماقاريشيق دورومو، ايفراط-تفريط و آنارخيزميندن آرينيب-دورولوب، ساغلام و دوغرو آخيمي، خاراکتئري آيدينلاشماليدير. شعر توپلولاري دؤنه-دؤنه چاپدان بوراخيليب يايينلانيرلار و بير پروفئسيونال تنقيدچي بوشلوغوندا دوروملاري آيدينلاشمايير. پروفئسيونال ادبياتيميزدا بو اوزدن يارانا بيلمه ييب. "جعفر بزرگ امینین ده سؤيله ديگي کيمي، بو گون چاغداش گونئي آذربايجان آيدينلاريني ان چوخ دوشوندورن مسئله اؤلکه ده محض پروفئسيونال ادبياتين يارانا بيلمه مه-سينين سببلريدير. تانينميش ادبياتشوناس عاليم صابير نبي اوغلو، چاغداش شاعيرلريميزدن هادي قاراچاي، نادير ازهري، همت شهبازي، سايمان آروز و .... بونون سببيني گونئي آذربايجان ادبياتيندا بو گون يئري داها چوخ حیس ائديلن تنقيدچيلرين، ادبي تنقيد خاراکتئرلي يازيلارين يئترينجه اولماماسيندا گؤرورلر. گنج يازار مليحه عزيزپور يازير: «ادبياتيميزين داها دا انکیشاف ائديب ايره ليله مه سي اوچون تنقيدچيلره چوخ احتياج وار. يعني اؤزلليکله گنج يازيچي نسلي نين داها دا گوجلنمه سي اوچون تنقيدچي نين اولماسي چوخ اؤنمليدير. چونکي تنقيدچي يازيلان اثرله اوخوجو آراسيندا بير کؤرپو کيمي ساييلماقدادير و يارانان هر صنعت تورو اؤزلليکله ادبي اثرلرين يئني قازانجلارينا يول آچار. بو گون بو بوشلوق گئتديکجه داها قاباريق حیس اولونماقدادير. قئيد ائدک کي، باريش، ائلدار موغانلي، سولئيمان ثاليث، نيگار خياوي، مرادعلي قافلانتي (قريشي)، علیرضا مييانالي و باشقالاري نين ياراديجيليغي حاقيندا ماراقلي مقاله¬لر يازان اونلو شاعير و تدقيقاتچي احمد آلووون چاغداش دؤور يازارلاري نين بديعي ارثينه، يئني يارانان اثرلره ادبي تنقيدين يئني موناسيبتينه حصر ائتديگي «ادبي-تنقيدي آراشديرمالار»، همت شهبازي نين «معاصير گونئي آذربايجان شعري-نين تنقيدي»، ائيواز طاهانين «ديل وارليغين ائويدير»، جعفر بزرگ امینين «چاغداش ادبياتين تنقيدي»، نادير ازهري نين «مقاله لر» آدلي کتاب و توپلولاري دا گونئي ادبياتشوناسليغيندا مؤوجود اولان بوشلوغو دولدورماق يؤنونده آتيلميش موهوم آدديملاردير. بو اوغورلو آدديملارين سيراسينا ائيواز طاهانين «ديل وارليغين ائويدير» کتابي حاقيندا هادي قاراچايين «ديل وارليغين ائوييميش» آدلي بؤيوک حجملي تحليل-اينجله مه يازيسيني و قادير جعفري نين «پوئما اؤزلليگي و پوئتيکا گؤزلليگي (قئيدلر)»يني و کيان خياوين و رقيه کبيري نين " سوسنبر يازيلاري " ايله باغلي قلمه آلديغي «نانه يارپاغيندا قادين هؤرومجک» و " ائويم " ده شامانيزم، مارکسيزم و جهنمين قيزغين سويوغو (رقيه کبيري نين " ائويم " روماني اوزرينه بير باخيش) " و شاعير ائلشن بؤيوکوندين " کيمليک مسئله لري و يازارلارين کيمليگي " ، " موغانين ادبي موحيطي و " قانلي گونش " پوئماسي باره ده " آدلي يازيلاريني دا علاوه ائده بيلريک. بو ادبي تنقيد خاراکتئرلي آراشديرمالارين ايچريسينده «پوئما اؤزلليگي و پوئتيکا گؤزلليگي»ني اينجله ين قادير جعفري نين چاغداش دؤورده منظومه سؤزونون اولکي مؤوقئعيني ايتيرمه سي مسئله سينه موناسيبتيني اؤرنک اولاراق گؤسترمک ايسته ييرم، طبيعي، خيردا ايملا يانليشلاريني ايصلاح ائتمکله: «منظومه سؤزو پوئما قارشيسيندا کئچرليليگيني ايتيريب و تجريد اولونوب. بونون سببي ايسه چاغداش پوئماچيليقدا نظم و دوزه¬نين ايتمه¬سي ايله ياناشي سربست پوئمالارين اورتايا گلمه سيدير. ديگر يؤندن چاغداش دؤورده کلاسيک پوئمالار بئله، ماهيتجه فرقلنرک يالنيز ناغيل، روايت خاراکتئريني ايتيريب. بونا آچيق-آيدين اؤرنک ايسه شهريارين «حيدربابايا سالام» و «سهنديه» پوئمالاري، بختيار واهابزاده نين «موغام» و «گولوستان» پوئمالاري، زهتابي نين «شاهين زنجيرده» پوئماسي و باشقالاري اولا بيلر. وورغولانان پوئمالاردا روايت ائتمک عنعنه سي قاليرسا دا، آرتيق ناغيلچيليق دويولماماقدادير. دونيا ادبياتيندا تانيش اولدوغوموز مودئرن پوئمالار ايچينده ت.س.ائليوتون «چوراق اؤلکه»سي و چاغداش ادبياتيميزدا ناصرمرقاتي نين «تالانميش گونش» کتابيندا همين آدي داشيان پوئمانين و «ياد تورپاغيم» پوئماسي نين آديني چکمک اولار. مودئرن پوئمالار روايت عنعنه سينه صادق قاليبلارسا دا، مودئرن ائستئتيکا اساسيندا قورولوب… " 
گونئي آذربايجاندا ان اساس پروبلئمين آنا ديلي مسئله سي، ايکينجي پروبلئمين ايسه ادبي تنقيدين ضعیفليگي نين اولدوغونو بيلديرن رقيه کبيري وضعيتين سببيني آنا ديلينده تحصيلين اولماماسي ايله ايضاح ائدير و سؤيله يير کي، پروفئسيونال تنقيدچيميز اولماماسي سببيندن اثرلر جيدي حالدا تنقيد اولونمور. ادبي تنقيد بوشلوغو، موحافيظه کار و پاتريارخال پسيخولوگييا، اؤي مني-اؤيوم سني جرگه لري و ... ندنلرين اوجباتيندان ادبياتيميزين دورومو بيز گنجلري چوخ کدرلنديرير. 
دوقتور.حسين سولئيمان اوغلو پروفئسيونال تنقيدين و تنقيدچيلرين يارانماسينين ضروريليگيندن بحث ائدرکن دئيير: " بو گون هر زامانکيندان داها چوخ شعريميزين تنقيده و تنقيدچيه احتياجي واردير. بير فرانسيز تنقيدچيسي: " پيس بير تنقيد بئله، يول گؤستريجي اولا بيلر " – دئيير. بيزده ايسه نه يازيق کي، پيس بير تنقيدچي بئله، يوخدور. " 
2013-جو ايلده اوشاق ادبياتي نين انکیشافي دا ادبي پروسسين اساس هدفلريندن اولموشدور… 
ادبيات، ميللي-مدني ارثيميزين، ائلجه ده نسليميزين داوامچيلاري، آيدين صاباحيميزين قارانتي، گله جگيميز دئديگيميز اوشاقلارين ساغلام روحلو، صاف عقيده¬لي، ساوادلي و هرطرفلي انکيشاف ائتميش اصل وطنداش کيمي يئتيشيب فورمالاشماسي اوچون اوشاق ادبياتينا بوتون زامانلاردا بؤيوک احتياج اولموشدور. لاکين آذربايجاندا اوشاق ادبياتي نين يازيلماسي و نشري ساحه سينده هميشه معين بوشلوقلار اولموش، عوموم ادبياتدان فرقلي اولاراق اوشاق ادبياتي نين انکيشاف يولو هميشه اوغورلو، هامار و محصولدار اولماميشدير. اوزون عصرلر بويو اوشاق ادبياتي¬نين انکیشافي لنگيميش، " بوستان " ، " گولوستان " ، " ديواني حافظ " ، " ابوعلی سينان " " نان وحلوا " ، " تاريخي نادير " ، " سرباز " و سایره. موقابيلينده آذربايجان تورکلرينه اؤز دوغما ديللرينده اوشاقلارين مطالعه سي اوچون اثر ياراتماغا ايمکان وئريلمه¬ميشدير. اونا گؤره ده قديم و اورتا عصرلر ادبيات خزينه¬سي اوشاق مطالعه¬سي اوچون نظرده توتولاراق يازيلان کتابلار باخيميندان کاساددير. بو معنادا آذربايجان اوشاق ادبياتي مفهومو دا يئني دؤوره – اون دوققوز عصره عاييد ادبي-پئداقوژي حاديثه دير… اون دوققوز و ييرمي عصرين اوللرينده کيفايت قدر اجتيماعي و ديني مضمونا، اخلاقي-ديداکتيک پافوسا، ائستئتيک تاثير گوجونه ماليک اولان اوشاق اوخوسو نمونه¬لري¬نين يارانماسينا باخماياراق، بو زنگين خزينه ايندييه قدر توپلانيب، بوتؤو حالدا آراشديريلماميش، نشر ائديلرک خالقا چاتديريلماميشدير. تصادوفي دئييل کي، بو گون بيزيم آ.باکيخانوو، س.ه.شيرواني، م.ه.صابير، آ.سحت، آ.شايق، س.س.آخوندوو ايستيثنا ائديلرسه، اونون انکيشافي يولوندا بؤيوک امک صرف ائتميش، ميرزه نصروللاه، حاجي سيد و جلال اونسي¬زاده لر، حسنعلي آغا خان قاراداغي، چئرنيايئوسکي، صفرعلي بي ولي¬بي¬اوو، احمدبي جاوانشير، محمدتاغي صدقي و ديگر گؤرکملي نوماينده¬لري حاقيندا تصووروموز بئله يوخدور. اونلارين بعضيلري نين آدلاريني ائشيتميش اولساق دا، اثرلريندن خبرسيزيک. بو معنادا اوشاق ادبياتيميزين انکیشاف منظره¬سينده آغ لکلر سيخ-سيخ نظره چارپير. لاکين بو سياسي آب-هوا، اؤگئي مناسبت آرتيق آرخادا قالميشدير. بو گون وطنين هم قوزئيينده، همده گونئيينده تاريخين موختليف مرحله¬لرينده خالقين ياراتديغي معنوي ثروتي هئچ بير استثنايا يول وئرمه دن بوتؤو حالدا آراشديريب اوزه چيخارماق، تبليغ ائديب گئنيش اوخوجو کوتله¬سي¬نين قيدا منبعينه چئويرمک يازارلاري، ضياليلاري دوشوندورن اساس مسئله¬لردندير. قئيد ائدک کي، گونئي آذربايجاندا و ايراندا اوشاق ادبياتي¬نين تمليني صمد بهرنگي ميللي سياسي حرکاتدا فعال ايشتيراک ائدن مسلکداشي و قلمداشي مرضيه اوسکولو «دالغا» ايله بيرليکده قويموشلار. 
بو گون گونئيده " اوشاقلارينيزين گؤز ياشلاريني قورويون، قوي اؤز چاغيندا اونلار سيزين قبرينيزين اوستونه تؤکولمه¬يه يارايا بيلسين " (پيفاقور)، حقيقتيني آنلايير و گئرچکلشمه¬سي اوچون اوشاق ادبياتي نمونه¬لري نين يارانماسينا و آراشديريلماسينا چاغداش دؤورده داها چوخ اهميت وئريرلر. تانينميش شاعير و تنقيدچي همت شهبازي آذربايجان ادبياتيندا ايلک اوشاق شعري کيمي محمد فضولی¬نين ايکي يوز بيت¬دن عبارت" صحبت¬اولاسمار " (مئيوه لرين صحبتي) آللئقوريک مثنويسيني قبول ائدير و يازير کي، بو کتاب 1958-جي ايلده باکيدا حميد آراسلي طرفيندن ياييليب. کاميل ميرباغيروو طرفيندن نثره چئوريلرک اوشاقلار اوچون حاضيرلانيب و تبريزده 1376 (1997)-جي ايلده «اسمر» نشرياتي طرفيندن ياييملانيب. اثرين بؤيوکلر اوچون يازيلماسيني دويوروق؛ آنجاق دريندن فيکيرلشديکده، يئني چاغدا «جيزگي فيلملري»، تمثيلي (اللئقوريک) بيچيمده اوشاقلار اوچون حاضيرلانماسيني گؤرنده، «سحبت¬اولاسمار»ين دا اوشاقلار اوچون تمثيلي بير ديل¬ايله يازيلديغيني دويورسان. بونا گؤره آذربايجانين ايلک اوشاق شعري (بلکه ده من دئيرديم شرقده) فضولييه عاييددير. 
همت¬ين بو مثنوي نين ماهيتينه وارماسي دا دوشوندوروجودور: " شاعير بو کتابدا مئيوه¬لرين ديلي ايله، اؤز اؤيودسل (نصيحت¬آميز) سؤزلريني دئيير و هر بير مئيوه اؤزونون خاصيتيندن دانيشير. شئيرده مئيوه¬لرين خاراکتئري واردير. فضولی مئيوه¬لرين خاصيتلرينه اويغون سؤزلردن فايدالانير. شاعيرين بو وصفلرينده بوتون مئيوه¬لر اؤزو-اؤزلوگونده تايسيزدير. هئچ بير مئيوه، باشقا مئيوه¬لرين ياخشيليغيني گؤرمک ايستمير و هر بيري اؤزونو ياخشيلارين ان ياخشيسي بيلير. سوندا باغا سياحته چيخان آدام دا ائله اونلارين ياراتديغي بو اويومسوز دونيالاريندان قاچماق فيکرينه دوشور. بو مئيوه¬لر آراسيندا هئچ بير فيکير و دويغو بيرلشمه¬سي يوخدور. اونلارين هر بيريسي نين داورانيشي «بوردا منم، باغداددا کور خليفه» ضربواولمثليني يادا سالير. " 
اکبر آزادين " فيرنگيز ايله قيرميزي دون " ، رامين جهانگيرزاده نين " آي سودا " ، زؤهره وفايي نين " ال-اله. اوشاق مکتبي – 3 " ، " آنا. اوشاق مکتبي – 5 " ، معصومه اژدري نين " بيز قوردوق " ، پرويز فروهرين " خوروزون پولو " ، ياقوب ويلهئم قيرئيم-صمد جبارپورون " خوشبخت اوغلان " ، روقيه عليقولونون " لاي-لاي چالديم ياتينجا " ، بئش. سوتايئو و ائلدار م. صادغين " مييوو ائله ين کيمدير؟ " ، محمد آبدين¬پورون " آلقيش عمي " ، " ياغيش " ، فاطيمه مير حسن¬پورون " درسه گئدن بير اوشاق " ، " شير و سيچان " ، " موللا نصرالدين يولدا " و " سِحرلي توربا " ، هاشيم ترلانين " اوشاق دونياسي " ، مرتضی مجدفرين " ايشلر و اوشاقلار: باخ گؤر کيمدير، نچيدير " ، فريده دادخواه¬ين " گؤي¬قورشاغي " ، زهرا وليزاده و م.شيمشگين " آچيل چتيريم، آچيل " ، محمدرضا اسماييلزاده نين " مئيوه لرين صحبتي " – " صحبتولاسمار " چئشمه سيندن " و س. اثرلري " اورمو توروز " سايتيندا ياييملانميشدير. 
چاغداش گونئي آذربايجان ادبياتي¬نين محصولدار ياراديجيليغا ماليک نوماينده¬لريندن بيري اولان رامين جهانگيرزاده اوچ جيلدليک " پئشه لر " و " عاييله¬لر " آدلي اوشاق شعر مجموعه سيني حاضيردا چاپا تقديم ائتميش، " دويمورام سني ايچمکدن " (يئني ساتيريک شئيرلر)، " ماياللاق " (ساتيريک نثر اثرلري)، " مينيمال ساتيريک شعر و نثر اثرلري " – بير و ايکي جيلد، همچنین اوشاقلار اوچون يازديغي " سئل قيزي " ، " نازلي " ، " اليفبا " ، " دؤرد فصيل " ، " خاللي و آللي " ، " قاريشقام " ، " رقملر " ، " بويالار " ، " چييلک " ، " ائلاي و ايلکاي " ، " حئيوانلار " (3 جيلدد)، " کوچه " ، " تيراختور باسدي قازا " ، " دؤرد فصيل " شعر، " اورخان و ماني " حئکايه مجموعه لريني ايسه نشر اوچون حاضيرلاميشدير. گونئيده " اوشاقلارين بؤيومه و انکیشاف، خيال، دويغو، دوشونجه و دويارليليقلارينا، ذؤوقلرينه اَييلرکن اَيلنمه¬لرينده ايشتيراک ائتمک مقصدييله رئاللاشديريلان جوجوق¬سو بير ادبياتا " سون دؤنملرده ماراغين بو درجه¬ده آرتماسي و انکیشافي¬نين تامينيله باغلي چاليشمالار اوزرينه نادير ازهري¬نين يازديغي فيکيرلرين تام بير گئرچک اولدوغونو يانسيدير: " اينديکي واختدا، گؤزل بير کتابچي دوکانينا گيرن بير اوشاق بؤيوک بير احتيماللا ايسته¬ديگي کتابي تاپا بيلر. شکيللي، رسيمسيز ماجرا رومانلاري، پري ناغيللاري و افسانه¬لر، فانتاستيک، اؤزياشام احوالاتلاري، تاريخ کتابلاري، طبيعتله علاقه دار کتابلار، شعرلر، قيساجا، يئر اوزونده وار اولان هر شئيله علاقه دار دوزونلرله کتاب رفلري دولدورار. بو گون کتاب اوخويان اوشاق سايي کؤهنه¬سينه گؤره چوخ آرتدي. کتاب ساتين آلماغا گوجو چاتمايان اوشاقلار اوچون خالق کتابخانالاري نين اوشاق کتابلاري حيصه سيندن داواملي اولاراق بورج کتاب آلينا بيلر. بير چوخ مکتبين ده اؤز خوصوصي کتابخاناسي واردير. اينديکي واختدا اوشاق کتابلاري نين هم تعليمچي، همده اَيلنديريجي اولماسينا اهميت وئريلير. آما کؤهنه¬دن بئله دئييلدي، اوسته¬ليک اوشاقلارين اوخوياجاق کتاب تاپمالاري آسان اولموردو. اون يئددي عصرين اولينده ياشاميش بير اوشاقلا بو مؤوضودا کونوشا بيلسيدينيز، اوخوموش اولدوغو کتابلارين آزليغينا و بونلارين يالنيز بير نئچه¬سي نين اوشاقلار اوچون يازيلميش اولماسينا شاشاردينيز. بوندان 150 ايل اولينه قدر کتاب دئييلينجه، اوشاقلارين عاغيلينا، باشدان سونا ياخشي داورانيش قايدالاري ايله دولو درس کتابلاري گليردي. تعليمچي کتابلارين يانيندا اوشاقلار اوچون ماراقلي، اَيلنديريجي کتابلار يازيلماغا باشلانالي چوخ اولمادي " . 
اسميرا فواد (شوکورووا) 

دوشونجه - اندیشه

ساخت و پرداخت هویتی در ایران/ سعید پیوندی

ساخت و پرداخت هویتی در ایران/ سعید پیوندی
ایرانی بودن به چه معناست و این حس هویتی مشترک میان مردمان سرزمینی که در داخل مرزهای امروزی کشور زندگی می‌کنند از ادامه...

ستارخان دوشونجه لرینی ، هله ده دوشونمه ین لر وار/ ابراهیم...

ستارخان دوشونجه لرینی ، هله ده دوشونمه ین لر وار/ ابراهیم...
چاغداش تاریخیمیزده اؤز دؤوروندن ایرلی گئدن اینسانلاریمیز آز اولماسا دا آراسیرا اؤزگه اولوسلارین بویوندوروغو ادامه...

ژان پول سارتر نه دئییردی؟

ژان پول سارتر نه دئییردی؟
ژان-پول سارتر (Jean-Paul Sartre) 1905-جي ايلده آنادان اولوب. گمي کاپيتاني اولان آتاسي او کؤرپه اولارکن دونياسيني ادامه...

شاید مسأله حق تحصیل به زبان مادری باشد!/ سعید متین پور

شاید مسأله حق تحصیل به زبان مادری باشد!/ سعید متین پور
در نخستین سال‌های دهه‌ی ۶۰ خورشیدی «حبیب ساهر» مدرس و مؤلف علم جغرافیا و شاعر نوپرداز با پرتاب خود از بالکن ادامه...

طبقه کارگر و مسأله ملی/ و. ای. لنین

طبقه کارگر و مسأله ملی/ و. ای. لنین
روسیه، تا آنجایی که به مسأله ملیتهای او مربوط می‌باشد، کشوری است مختلط. سیاست حکومت که همانا سیاست ملاکین ادامه...

سون ماتريال