اسناد Senedler

بيرليك: داخيلي نيظامنامه

 1.     "بيرليك" اونون سياسي پلاتفورمونو حياتا كئچيرمك يولوندا متشكيل ايش قاباغا آپارانلارين، تشكيلاتي دير.

"بيرليك"ين تشكيلات اورقانلاري

2.     قورولتاي: قورولتاي "بيرليگ"ين عالي سياسي اورقاني دير و بوتون "بيرليك" عوضولري­نين اوچده ايكيسي­نين ايشتيراكي­ايله رسميت تاپير. قورولتاي ايلده بير كره دكابر آيي­نين اوچونجو هفته باشي كئچيريلمه­لي­دير. (ايلك قورولتاي 21 و 22 دكابر 2013) قورولتاي مجازي و عياني كئچيريله بيلر. ايكي عياني قورولتايين فاصيله­سي 2 ايلدن آرتيق اولمامالي­دير. 

3.     مركزي شورا: قورولتاي اٶز آراسيندان 13 نفرليك بير مركزي شورا سئچير. مركزي شورا ايكي قورولتاي آراسيندا، عضولرين، ايشلرين و پلانلارين ايجرا اولماسي پراسئسينده نظارت ائتمكدير. مركزي شورانين ايجلاسي، اٶز عوضولري­نين ان آزي ياريسي يا ايجرا هيئتي­نين ايستي­ييله چاغيريلير. مركزي شورا سئچگي­لر آپارماقدان يا قورولتايين سئچدي­يي اورقانلارين تركيبينه  موداخيله ائتمك موستثنا اولماقلا، بوتون ايختيارلارا صاحيبدير.

4.     ايجرا هيئتي:  مركزي شورا طرفيندن سئچيلير، قورولتاي­يين بوتون قرارلاري و پلاتفورمدان ايره­لي گلن ايشلري يئرينه يئتيرير. ايجرائيه هيئتينه آيري-آيري ساحه­لرده و جغرافيايي بٶلگه­لرده، بيرليگين پلاتفورمونو حياته كئچيرمك اوچون عوضولر سئچيليرلر. ايجرا هيئتي اٶز آراسيندان بير سيرا مسئول­لار سئچمه­لي­دير. او جومله­دن: سٶزچو، قادينلار،كاتيب، تشكيلات، مالي، گنجلر.

5.     موشاويرلر: ايجرا هيئتي، بيرليك عوضولريندن علاوه موختليف مٶوضوعلاردا داخيلدن و خاريجدن، ميللي حركاتي سيرالاريندان،  ايختيصاص و تجروبه صاحيبي اولان ميللي ضيالي­لار، شخصيتلر، قلم صاحيبلري و سياسي كادرلارين آراسيندان اٶزونه مشاويرلر سئچير و حسام مسئله­لرده قرار آلمادان اٶنجه، اونلارين مصلحت­يندن يارارلانير. موشاويرلر ايلك نٶوبه ده اونلارين معلومات و تجروبه­لري اسايندا سئچيليرلر و فرقلي و حتي مخاليف سياسي قووه­لرين منسوبلاري آراسيندان سئچيله بيلرلر.

6.     كوميسيون­لار: كونكرت مسئله­لري آراشديرماق اوچون، قورولتاي، مركزي شورا يا ايجرا هيئتي، كوميسيون­لار سئچه بيلر. كوميسيون­لارين فعاليت مدتي اولجه­دن بير زامان محدولوغونوا مقيد اولمالي­دير.

عوضولر

7.        بيرليگ­ين سياسي پلاتفورمونون كليت­يني قبول ائديب و تشكيلاتين ايش پلانلاريني حياته كئچيرمك يولوندا چاليشان حقيقي شخصلر، بيرليگه عوضو اولا بيلرلر. عوضولويون شرطلري 16  ياشدان يوخاري اولماق و عوضولوك حقي اٶده­مك­دير. عضولوك حاقي­نين مبلغي­ني قورولتاي معينلشديرير.


داخيلي دموكراسي­نين قايدالاري

8.     ايجرائيه هيئتي­نين كاتيبي، داخيلي موناسيبتلرين تنظيم اولماسيندا باش رولون صاحيبي­دير. كاتيب، تشكيلاتين اي ميلينه مديريت ائدير، بوتون لاييحه­لر اولجه كاتيبه يوللانير و كاتيب اونلاري ثبت ائتديكدن سونرا موشاويره بوراخير و پراسئسين دواميندا يا توپلانتي­سيز قبول / رد اولماسيني اعلام ائدير يا توپلانتي­دا سس وئرمه­يه چيخارير. كاتيب توپلانتي­لارين چاغيريلماسي، گٶنده­لي­يين حاضيرلانماسي، پروتوكل­لاشديرماق و اونلاري عضولريني ايختيارينا قويماغا مٶظف­دير.

  9. لاييحه: بوتون تشكيلات عوضولري­ "لاييحه" وئرمك حاقينا ماليك­ديرلر. لاييحه ايكي يول­لا قبول/رد اولا بيلر: توپلانتي­يا گئتمه­دن تارتيشان اورقانين اوچده ايكيسي­نين موافق/موخاليف سسي­ايله. توپلانتي­دا سس چوخلوغو ايله.

 

10.ايچري يٶنلولوك: بيرليك بوتون فعاليتلرينده ايچريده اولان سياسي دورومو نظرده آلمالي- داخيل-خاريج فرقلريني، داخيلين خيرينه آزالتماقدا فعال اولمالي­دير. بو يولدا داخيلي قووه­لرين گوونلي­لي­ييني نظره آلماق شرطيله، داخيلده گئدن آزادليق موجاديله­سي­نين تام اينتئقره اولموش بير قولو اولماغا جان آتمالي­دير.

11.ايختيصاص: بيرليك اٶز عضولريني، عمومي سياسي فعاليت­دن مقصد يٶنلو ايختيصلاشماغا دوغرو يٶنلنديرمه­لي دير و لازيم اولان بوتون ساحه­لره عمومي ادييات و كونكرت معلوماتلاردن عيبارت ايختيصاصلانميش ديجيتال كيتابخانا ياراتمالي­دير.

12.ائكسپرتيز: بيرليك بير سياسي تشكيلات كيمي، اٶز آراسيندا، اوز اورقانلاري و اٶز عوضولري و مشاورلري آراسيندا، هر قرار و لاييحه­ني قبول ائتمه­دن، داخيلي و خاريجي مٶوجود ائكسپرتيردن ماكسيموم يارالانمالي­دير. بيرليك، ميللي حركاتين سيرالاريندا دا عمومي سياسي شعارلار و ايستكلري، دونيادا مٶوجود اولان تجروبه­لر و علم­ين نائيليتلريله زنگينلشديرمه­يه دوغروو چاليشمالي­دير.

13.مشاويره طرفلري و مشاويره دٶورو: بيرليك ده هر بير لاييحه­ني قورولتاي، مركزي شورا و ايجرائيه هيئتينه تقديم ائدركن، ايش قونوسونا اويقون اولان، مٶوضوعلا اويقون اولان، "مشاوير طرفلر"ين سياهيسي ­نه ده معينلشديريلمه­لي­دير. "موشاوير طرفلر" بيرليگ­ين موشاويلريندن يا موقتي مصلحتچي­لر و ائكسپرتلردن عيبارت اولا بيلر.

14.پلانلي فعاليت: بيرليك اٶز فعاليتلرينده اٶندن پلانلاشلاشميش لاييحه­لره اوستونلوك وئرير. هر قورولتايدان اون اوزاغي 2 هفته سونرا سئچيلميش اورقانلار، زمان بٶلوملري و مرحله­لري اٶزونده ائحتيوا ائدن فعاليت پلاني­ني تشكيلاتا تقديم ائتمه­لي­دير.

15.افكتيوليك: بيرليك اٶز داخيلي دموكراتيك حياتيني ائله قورمالي­دير كي، ايجلاسلار و داخيلي تارتيشمالارا، وقت و ائنرژي­نين ان آز ميقداري صرف اولمالي­دير. بوتون ايجلاسلار گرك ايجلاس قاباغي حاضيرليقلارين دواميندا قورلسون.

16. ايش بيرلي­يي: بيرليك بوتون آذربايجان فعال­لاري، قلم صاحيبلري، علم آداملاري، درنك­لر و سياسي تشكيلاتلارا سون درجه­ده سايقي­لا ياناشير و اونلارلا كونكرت امكداشليقلار آپارمالي­دير. بو مقصدله بيرليگ­ين آپارديغي بوتون لاييحه­لر، عئيني حالدا باشقا آكتيورلارلا موناسيبتده اينترآكتيو ماهيتلي اولمالي و هر لاييحه موموكن اولان ان گئنيش و درين مضمونلو ايش بيرلي­يي لاييحه­سي اولمالي­دير. بيرليك يالنيز موستثنا حال­لاردا و يالنيز سون آلترناتيو كيمي تك باشينا لاييحه­لر پالانلاشديرمالي­دير.