بيرليك دن خبرلر

قيدسيز شرطسيز سٶز آزادليغيندان هر يئرده و هر بير فيكري ايفاده ائتمك اوچون مودافيعه ائديريك!

گونئي آذربايجان ميلي دموكراتيك بيرلي­يي (بيرليك)ين بياناتي:

  قيدسيز شرط سيز سٶز آزادليغيندان هر يئرده و هر بير فيكري ايفاده ائتمك اوچون مودافيعه ائديريك!

 

 2012-جي ايلين دكابر آييندا قوزئي آذربايجانلي يازيچي اكرم ايليسلي،­ "داش يوخولار" آدلي اثريني اٶز نظارتي آلتيندا ترجومه ائتديريب، توركجه سيني نشر ائتمه ­دن، بير باشا روس ديلينده "دروژبا نارودا" آدلي روس ژورناليندا نشر ائتميشدير. اكرم ايليسلي عادي بشر منطيقي­له باشا دوشمه­ سي چتين اولان بير استدلال­ لا، بو اثرينده, تجاوزكار و تجاوز قورباني ­سي­ نين يئريني عوض ائتمكله، گويا خالقلار دوستلوغونا خيدمت ائتمك نيتينده اولدوغونو ايديعا ائتمكده ­دير. مٶلفين مثبت قهرماني­، اثرين سونوندا ائرمنيستان جومهوريتي ­نين اچميادزين آدلي بٶيوك كليساسينا گئديب، اوردا مسيحي اولماق آرزوسيلا دونياسيني دئيشير. آذربايجان جمهوريتي بو آنلاشيلماز آدديمي و گٶزله ­نيلمز وضعيتي مديريت ائتمكده، دموكراسي و اينسان حاقلاريني ريعايت ائتمك و دمكراتيك عنعنه­ لر باخيندان يوخسول­لوغون نوماييش ائتديرن بير سيرا حركتلرين شاهيدي اولموشدور.

 آذربايجان ميللتي، وطنيميزين قوزئي­يينده، بشر تاريخي­نين ان قدار توتاليتر رئژيمي­نين تضيقاتيني ياشاميش و 70 ايل كمونيزم اسارتي عرضينده، سٶز آزادليغندان محروم قاليب و ميليبونلارلا آذربايجانلي، بير نئچه نسيل بويونجا، سٶز آزادليغيندان محروم دونيايه گليب، بو محروميتله دونيالاريني دئيشميشلر. بو باخيمدان آذربايجان جومهوريتي­نين آنا ياساسي و اونون هر بير ماده ­سي، ميلتيميزين سونسوز عذاب اذيتلري­نين باهاسينا اوردا درج اولا بيلميشديرلر. بو آنا ياسانين بير ماده ­سينده يازيلير:

 "47-جي ماده. فيكير و سٶز آزادليغي

  1. I.هركسين فيكير و سٶز آزادليغي واردير.
  2. II.هئچ كس اٶز فيكير و عقيده­ سيني آجيقلاماغا و يا فيكير و عقيده­ سيندن دٶنمه ­يه مجبور ائديله بيلمز."

بيز اينانيريق كي، بو ماده ­ده گلن تضمينات، چوخ واخت، اهالي­نين بير فاييضليق و بير نفر ليك آزليقلاري­نين حاقلاريني قوروماق اوچون­دور. بوتون دموكراتيك توپلوملاردا اولدوغو كيمي، آذربايجان وطنداشي يالنيز جمعيتده حاكيم اولان عمومي فيكري يا حاكيم ديرلري پايلاشديغي زامان يوخ، اونون تك بير سس كيمي، عمومي شعارلار، ميللي ماراخلار و انساني ديرلره باغلي اولماديقلاري زامان دا، اونلارين فيكير و سٶز آزادليقلاري يوخاريدا كي بند و اونو ايجرا ائتمه­ يه مسئول اولان آذربايجان دٶولتي طرفيندن قورونمالي­دير.

قيد شرط سيز سٶز آزادليغي

بيز، بير دانيلماز اينسان حاقي كيمي، سٶز آزادليغينا هئج بير قيد-شرط علاوه ائتمه­دن اينانيريق. بوگون، بشريت­ين موشترك تجروبه ­سي­نين ذيروه­ لري سانيلان دموكراتيك اٶلكه­ لرده، سٶز آزادليغي يالنيز "دوزگون" سٶزلره يوخ، هر بير ايفاده حتي غيري دموكراتيك تفكورلرين صاحيبلري اوچون ده تٲمين اولماقدادير. بيز اكرم ايليسلي و اونون كيمي دوشونن هر بير فيكيرين آزادليغيني ايستيريك. بيز حتي ايراندا فارس استعمارچي­ليغي­ دوكترينالاري­نين مٶليفلري اولان و هر بير سببدن ايران رئژيمي­نين غضبينه توش گلميش اينسانلارين، سٶز آزادليغيني مودافيعه ائتميشيك و ائديريك. بيز، قورماق ايسته­ دي­ ييميز گونئي آذربايجان دٶولت قورلوشو و توپلوموندا دا، هر بير فيكيرين حتي غيري دمكراتيك ديرلرين بياني اولان فيكيرلرين آزادليغيني ايستيريك و گله­ جك ميللي و دموكراتيك گونئي آذربايجان دوٶلتي­ني بو آزادليغين قارانتي كيمي گٶروروك. اكرم ايليسلي­نين سٶز و عقيده آزادليغي قورونمالي و اونا قارشي تضييقلره قارشي­ سيندا، هم قوزئي آذربايجان دٶولت استروكتورلاري اٶز وظيفه بورجلاريني يئرينه يئتيرمه ­لي­ديرلر و هم سٶز آزادليغينا اينانان هر بير آذربايجان وطنداشي اونون فيكيرلري حاقيندا نه دوشوندويوندن آسيلي اولماياراق، اونون سٶز آزادليغي و هر بير وطنداش حقوقلاريني مودافيعه ائتمه­ لي­ دير. بيز اينانيريق كي، اكرم ايليسيلي ­نين يالنيش فيكيرلري­نين ماهيتي بو فيكيرلرين سربست سٶيله ­نيلمه ­سي، سٶزلرين مٶليفي­ نين تام آزادليغي و اٶز مٶوقعيندن مودافيعه ائتمه ­يه هرطرفلي ايمكاني اولماق شرطينده چوخ راحاتليقلا مومكون­­­دور. عكس حالدا، سٶز آزادليغي تام تٲمين اولمايان بير سٶز صاحيبي­نين ايلك اٶنجه بير "قورباني" اولماسي گوندمه گلير و اونون فيكيرلري­نين يالنيش­ليغي آرخا پلاندا قالير. بئله بير شراييط­ده اكرم ايليسي آذربايجان آنا ياساسيندا گلميش بوتون حاقلاري تٲمين اولدوغو حالدا، آذربايجان ايجتيماعيتي و آذربايجان قلم و فيكير صاحيبلري اونون اثرينده گلميش فيكيرلرين يالنيشليقلاريني آچيب آرايا قويابيلرلر. بوگون آذربايجان سيويل توپلومو، اكرم ايليسلي­ نين آرايا قويدوغو يالنيش فيكيرلرله، دوزگون و دموكراتيك بير اصول­لا، قارشي­لاشمالي­دير.

 بيز هله فيكر و سٶز آزادليغي، ايران ايسلام جومهوريتي­نين قوزئي آذربايجاندا ايداه ائتدي­يي غيري لئقال ديني فاناتيك شبكه­لر طرفيندن هده­له­نيب نهايت بو يولدا جانيني قوربان وئرميش رافيق تقي­ني اونودماميشيق. گنج آذربايجان جمهوريتي او حالدا، اٶز وطنداشي­نين سٶز و عقيده آزادليغيني قورويا بيلمه­ مه­ سي اوچون دونيا ايجتيماعيتي طرفيندن جيدي تنقيدلره معروض قالدي. بوگون آرتيق ايران ايسلام جومهوريتي­نين ديني فاناتيزم تبليغي و "مقدس ترور"لارين تشكيل ائتمه­ سيله مشغول اولان اورقانلاري، اكرم ايليسلي مسئله­ سينده بيطرف اولماديقلاريني آچيقجاسينا بيان ائديب و بيرداها قوزئي آذربايجان جمهوريتينده چيركين و غيري اينساني نيتلرده اولدوقلاريني بيان ائدن سيقنال­لار وئريرلر.

 بيز بير طرفدن قوزئي آذربايجانين دٶولتي و سيويل توپلومونو، اكرم ايلسيلي ­نين كانستيتوتسيا و اينسان حاقلاريني آكتيو قوروماغا چاغيريريق و باشقا طرفدن آذربايجانين قوزئي و گونئي­ينده هابئله وطندن كناردا ياشايان آذربايجانلي­لاري، آذربايجان رسپوبليكاسي­نين ائرمنيستان­ين، روسيه و ايران حيمايه ­سي آلتيندا حربي تجاوزونه قوربان اولماق فاكتيني بوتون تفروعاتيله دونيا ايجتيماعيتينه چاتديرماغا دعوت ائديريك. بير ميلون اينسانين بوگون ايكينجي نسيلي، يوردوندان ديدرگين دوشموش قاچقينلار كيمي ياشاماقداديرلار، قوزئي آذربايجانين اراضيسي ائرمنيستان­ين حربي ايشغالي آلتيندادير و آذربايجان اراضي­سينده ائرمنيستان اوردوسونون آپارديغي حربي عمليات نتيجه­سينده 30 ميندن آرتيق آذربايجان وطنداشي هلاك اولموشدور. بوتون بو فاكتلاري نه هانسي سا ادبي اثر سوآل آلتينا آلا بيلر و نه بير نفري كانستيوتسيا حاقلاريندان محروم ائتمك يا دٶولت اورقانلاري­نين بو حاقلاري قوروماقدا لاقيد موناسيبت بسله­ مه­ سي.

 بير داها تكرار ائديريك كي، بيز، قيدسيز شرطسيز سٶز آزادليغيندان هر يئرده و هر بير فيكري ايفاده ائتمك اوچون مودافيعه ائديريك!

گونئي آذربايجان ميلي دموكراتيك بيرلي­يي (بيرليك)

ايجرا هيئتي

19 فورال 2013